նախընտրելի դարձնելԹուրքիայի խորքային հարցերը հայերի հանդեպ չեն փոխվել վերջին հարյուրամյակի ընթացքում, ինչպես եւ չեն փոխվել մինչ այդ հարյուրամյակների ընթացքում։ Այս մասին «Ուժի գործոն» հաղորդաշարի եթերում NEWS.am-ի թղթակցի հետ զրույցում ասել է Երեւանի պետական համալսարանի արեւելագիտության ֆակուլտետի դեկան, թուրքագետ Ռուբեն Մելքոնյանը։
Նա հիշեցրել է, որ թուրքական կառավարությունը պաշտոնապես փառաբանել է Հայոց ցեղասպանության կազմակերպիչներին դեռ 1926թ., եւ նման որոշում կայացվել է պաշտոնական մակարդակով։
Փորձագետն ավելացրել է, որ Թուրքիայի Ժողովրդահանրապետականկուսակցությունը, որն այսօր ներկա նախագահ Էրդողանի հիմնական մրցակիցն է, ստեղծվել է երիտթուրքերի երկրորդ էշելոնի կողմից։ «Թուրքիայում երիտթուրքերը իշխանության ղեկին էին մինչեւ 1950թ.։ Թուրքիայի առաջին երեք նախագահները եղել են երիտթուրքական կուսակցության անդամներ։ Մեկը Թալեաթի աշակերտն էր, մյուսը՝ Էնվերի, երրորդը՝ Ջեմալի ընկերը»,- նշել է Մելքոնյանը։ Այս առումով թուրքագետը տրամաբանական է համարել Հայոց ցեղասպանության կազմակերպիչների (Թալեաթ, Էնվեր, Ջեմալ) դիմանկարների առկայությունը քեմալականների ներկա հանրահավաքներին։
Նրա գնահատմամբ՝ Մերձավոր Արեւելքում երբեք խաղաղություն չկա, եւ այժմ ընթանում է մի գործընթաց, որը կավարտվի սահմանների եւ ազդեցության գոտիների նոր վերագծմամբ։ Մելքոնյանը նշել է, որ Թուրքիայի ազդեցությունը տարածաշրջանում վերջին տարիներին միանշանակ մեծացել է, եւ դա սկսվել է Լեռնային Ղարաբաղի 44-օրյա պատերազմի ժամանակ, որում Թուրքիան ներգրավված է եղել թե՛ ռազմական, թե՛ դիվանագիտական առումներով։
«Դա թույլ տվեց նրան ֆիզիկապես եւ քաղաքականապես ներթափանցել Հարավային Կովկաս: Սիրիայում Թուրքիան բլից-կրիգ իրականացրեց եւ 1-2 շաբաթվա ընթացքում հասավ Ասադի կառավարության տապալմանը, ինչը թույլ տվեց նրան էլ ավելի մեծացնել իր ազդեցությունը տարածաշրջանում։ Բացի այդ, Թուրքիան նախկինում ապահովել է իր ներկայությունը Լիբիայում եւ ամրապնդել իր դերը Միջերկրական ծովում»,- ընդգծել է նա։
Թուրքագետն ավելացրել է, որ չնայած Թուրքիայի եւ Իսրայելի միջեւ հռետորաբանության մակարդակով սրվող առճակատմանը, Անկարայի պահվածքը վստահություն չի ներշնչում իսլամական աշխարհին, քանի որ հրեական պետության հետ համաձայնագրերը շարունակում են ուժի մեջ մնալ։ «Ուստի դժվար է կանխատեսել պատերազմ Թուրքիայի եւ Իսրայելի միջեւ՝ հաշվի առնելով նաեւ ԱՄՆ հավասարակշռող դերը»,- եզրափակել է Ռուբեն Մելքոնյանը։
