ՆախընտրելիԵթե Հայաստանի վարչապետին անվստահություն հայտնելու գործընթացի նախաձեռնողները եւ նրանց կողմնակիցները հետաքրքրված լինեին, որ հարցը ներառվի խորհրդարանական օրակարգում, ապա նրանք արդեն համապատասխան աշխատանք կկատարեին նրանց հետ, առանց որոնց ձայների այս հարցը չի կարող լուծվել։ Այս մասին հունիսի 12-ին լրագրողների հետ զրույցում հայտնել է «Հայաստան» խմբակցության դաշնակցական պատգամավոր Արթուր Խաչատրյանը։
Նրա խոսքով՝ տպավորություն է ստեղծվում, որ ութ մարդ արդեն ստորագրել է, մնում է հավաքել 28 պատգամավորի ստորագրությունները, որից հետո նրանք «կվազեն» հարցը խորհրդարանի օրակարգ մտցնելու համար, եւ 72 ժամվա ընթացքում կընտրվի նոր վարչապետ։ «Նրանք հրապարակել են վեց ստորագրությամբ թուղթ, մենք հրապարակել ենք 28 ստորագրությամբ թուղթ եւ նշել, որ պետք է ապահովվի 36 ստորագրություն։ Ես ուզում եմ հասկանալ, թե ովքեր են Հայաստանի վարչապետին անվստահություն հայտնելու այսպես կոչված գործընթացի նախաձեռնողները։ Եթե դա Հայաստանի Հանրապետական կուսակցությունն է, ապա անհասկանալի է, թե ինչու սկզբից նրանք հանդես չեն եկել։ Հարցեր են առաջանում»,- նշել է Խաչատրյանը։
Նա հիշեցրել է, որ «Հայաստան» դաշինքը քվեարկության գործընթացի վերաբերյալ իր դիրքորոշումը հայտնել է մի քանի ամիս առաջ, եւ հայտարարված նպատակից որեւէ շեղում չի եղել: Նրա խոսքով՝ սա երկու օր առաջ հաստատել են խմբակցության ղեկավարը, ինչպես նաեւ «Հայաստան» դաշինքի պատգամավորները: Պատգամավորը բացատրել է, որ առանց փողոցային պայքարի անհնար կլինի ապահովել անհրաժեշտ 54 ձայնը Նիկոլ Փաշինյանին անվստահություն հայտնելու համար:
Միաժամանակ, խորհրդարանականը կոչ է արել իշխանություններին չմիջամտել ընդդիմության գործերին։ «Թող չմտածեն, թե իրենք անխորտակ են»,- զգուշացրել է նա։ Խաչատրյանն ընդգծել է, որ ընտրություններին Դաշնակցության մասնակցության ձեւաչափը որոշելու իրավունքը պատկանում է բացառապես կուսակցության Գերագույն ժողովին։
