նախընտրելի դարձնելՃակատագի՞ր է, թե՞ ուղղակի պատահականություն, բայց մանկագիր Ֆրիդա Սահակյանի 2 դուստրերն էլ թամադա են, ասել է թե Զուրաբյանների ընտանիքում հավաքվել են ուժեղ կանայք: Կանանց միջազգային օրվա կապակցությամբ NEWS.am-ը որոշեց անդրադառնալ հենց ուժեղ կանանց, ովքեր իրենց մասնագիտությամբ եւ աշխատանքով փոքր-ինչ տարբերվում են մնացած կանանցից, բայց միեւնույն ժամանակ շարունակում են մնալ կին:
Շաբաթվա վերջին Նարինե Զուրաբյանը հարսանիքի է, բայց ոչ թե հյուրի կարգավիճակով, այլ աշխատողի: Կին-թամադան ավարտել է Խ Աբովյանի անվան պետական մանկավարժական համալսարանի բանասիրական ֆակուլտետը: Դեռ մանկուց Նարինեն երազում էր դառնալ մանկավարժ կամ էլ հաղորդավարուհի: «Իսկ թամադան կյանքի հանգամանքներով ստացվեց: 2007թ ճակատագրի կողմից սահմանվեց, դա մասնագիտություն չի… Ինձ համար թամադա լինել նախ եւ առաջ նշանակում է սիրելի գործ, կենսակերպ, նաեւ մասնագիտություն, բիզնես` հաճելին օգտակարի հետ»,- նշեց նա:
Հեռուստադիտողներին նա հայտնի է սերիալներից եւ գովազդներից: Տարբեր շոուներ եւ միջոցառումներ վարելու 6, իսկ թամադայության 3 տարվա փորձ ունի:
Նրա քույրը` Լիանա Զուրաբյանը, եւս թամադա է, ասմունքող եւ հաղորդավարուհի: «Ես ավելի շատ կուլիսներում եմ հուզվում, քան հարսանիքներում: Նարինեն շատ կենսախինդ է, շատ լավ կազմակերպում եւ ղեկավարում է: Ես ուրախանում եմ, որ գնում եմ հարսանիքների եւ ինձ ասում են, որ Լիանա ջան այն անգամ քույրդ էր վարում, շատ լավ անցավ»,- նշեց Լիանա Զուրաբյանը: Երկու թամադաների մորը աղջիկների ընտրությունը չի զարմացրել: «2 աղջիկների մեջ էլ կար կազմակերպչական ջիղ եւ ես չզարմացա նրանց ընտրությունից: Կարծում եմ, որ եթե կինը կարող է ծանրորդ դառնալ, ապա ինչու չի կարող սեղան վարել, թամադա լինել: Ես կցանկանայի, որ դա ավելի լավ ընկալվեր»,- ասաց մանկագիր Ֆրիդա Սահակյանը` առաջարկել թամադա բառի փոխարեն օգտագործել հանդիսավար բառը:
Թբիլիսիի պետական համալսարանում, ի թիվս այլ մասնագետների, կրթվում եւ պատրաստվում են պրոֆեսիոնալ թամադաներ, իսկ մեզանում նման բան չկա: Կին թամադան մեզանում նորություն է: Որոշ մարզերում անգամ ասում են «Յա, կնի՞կը գա մեզի ղեկավարի»:
Կին թամադայի կարծիքով` թամադան պետք է լինի բազմաշնորհ, ունենա ճարտար լեզու, արտիստիզմ, մարդկանց հետ շփվելու կարողություն: Ցանկալի է, որ կարողանա նաեւ ասմունքի, պարի:/ցույց է տալիս իր հագուստը, հարսանիքում գնչուական է պարում/
Նարինեն պատվերներ ունենում է թե Երեւանից, թե Հայասատանի տարբեր մարզերից, տարվա բոլոր ամիսներին, բացի մայիսից, աշնանը հատկապես ամուսնություններն են շատ, ամռանը` մկրտությունները: Ավելի քան 300 հանդես է վարել` շփվելով բանվորի ու բարձրաստիճան պաշտոնյաների հետ, բայց, ըստ նրա, ամենից հաճելին աշխատավոր խավի սեղանին թամադայություն անելն է: Ինչ վերաբերում է գներին, ապա ստանդարտ գին գոյություն չունի, կին թամադայի ծառայությունների արժեքը սկսվում է 300 դոլարից:
Նարինեն 2 որդի ունի, ովքեր միշտ օգնում են իրեն հարսանիքի նախապատրաստվելիս, օրինակ` վիկտորինաներ կազմելիս: Երեխաները չբացառեցին իրենց` ապագայում թամադայությամբ զբաղվելու վարկածը, բայց բացառեցին իրենց կանանց թամադայությամբ զբաղվելը, չնայած Նարինեն ուրախ կլինի որ իր հարսը թամադա լինի, ասում է իրար լավ կհասկանանք:
Ինչ վերաբերում է հայկական քեֆ ուրախություններին երրորդ բաժակից հետո տղամարդկանց կողմից ոտնձգություններին, անպարկեշտ առաջարկություններին, ապա Նարինեի անվտանգությունը միջոցառումներին ամբողջությամբ ապահովված է, բայց կին թամադայի աշխատանքում կա մեկ խանգարող հանգամանք` խանդը:
Կին թամադայի աշխատանքի առանձնահատկությունների, հարսանիքը լավ անցկացնելու եւ այլ հետաքրքիր մանրամասների մասին առաջարկում ենք ծանոթանալ տեսանյութում:
Պատրաստեց` Ինգա Մարտինյանը
