Բագրատ Սրբազանը հայտարարեց՝ Հանրապետության հրապարակից երթով գնում են դեպի ԵՊՀ։ Նա կոչ արեց թե մարզերում, թե Երևանում սեփական նախաձեռնությամբ կամ խմբերով ճնշում գործադրել՝ անհնազանդության խաղաղ գործողություններ կատարել։
«Որպեսզի այն պահանջը, որ դուք ձևակերպել եք, որը իմ շրթունքներից էլ հնչեց, ի կատար ածենք»,-ասաց նա։
Սրբազանը նաև նշեց, որ այսօր երեկոյան ժամը 18։30 հավաքվում են Հանրապետության հրապարակում։
«Ես պտտվելու եմ քաղաքի տարբեր հատվածներում, այցելելու եմ տարբեր տեղեր, հանդիպելու եմ երիտասարդների, ուսանողների՝ քննարկելու, խորհրդակցելու: Ինձ ոչ վարույթով, ոչ կալանքով, ոչ էլ մահով կարող են վախեցնել: Մեռելներ չեն կարող ողջերին որեւէ բանով վախեցնել»,-ասաց նա:
Հիշեցնենք, որ նախօրեին Հանրապետության հրապարակում Բագրատ Սրբազանը հայտարարել էր. «Վաղվանից առավոտ ժամը 10-ին բոլոր հնարավոր վայրերում խաղաղ անհնազանդության գործողություններ ենք անցկացնելու: Դիմում եմ բոլոր ուսանողությանը, բուհերին, այն գործարարներին, որոնց համար փողը գերագույն արժեք չէ և մնացած ուսումնական հաստատություններին՝ դասադուլ անելու։
Վստահ ասում եմ՝ մեր ուզածը լինելու է, ես հավես չունեմ ամիսներով փողոցներում պտտելու, 7-10 օր ամենաշատը, առավել ժամանակ չկա, որքան օրինական ճանապարհը ժամանակ պահանջելու է, այդպես էլ լինելու է, խոստանում եմ ձեզ ոչ մի ամիս, ոչ երկու ամիս, ոչ հինգ ամիս, կոնկրետ գործողությունները կանենք, կոնկրետ արդյունքներն էլ կստանանք, բայց պետք է միասին անենք»:
Ավելի ուշ նա մի շարք ընդդիմադիր պատգամավորների հետ գնացել էր հյուրանոցներից մեկը՝ քննարկում ունենալու: Նրա կողքին էին «Հայաստան» խմբակցության ղեկավար Սեյրան Օհանյանը, պատգամավորներից Արմեն Ռուստամյանը, Ասպրամ Կրպեյանը, Իշխան Սաղաթելյանը, «Պատիվ ունեմ»-ից՝ Թագուհի Թովմասյանը: Կարճ ժամանակ անց նրանք դուրս եկան հյուրանոցից:
