Եվրանեսթի ԽՎ նստաշրջանում Ադրբեջանի նախագահ Իլհամ Ալիեւի հակահայկական ելույթում այնպիսի անընդունելի շեշտադրումներ էին, որ շատ վատ տպավորություն թողեցին Եվրանեսթի եվրոպական բաղադրիչի պատգամավորների վրա: Այդ մասին այսօր` լրագրողների հետ զրույցում նշել է Եվրանեսթում հայաստանյան պատվիրակության ղեկավար, ՀՅԴ խմբակցության ղեկավար Վահան Հովհաննիսյանը:
«Որոշ ադրբեջանցի պատգամավորներ նույնիսկ ներողություն խնդրեցին իրենց նախագահի պատճառով»,- նշեց Հովհաննիսյանը` հասկանալի պատճառներով չնշելով այդ պատգամավորների անունները:
Ըստ Հովհաննիսյանի, հայկական պատվիրակությունը արժանի պատասխան է տվել Ադրբեջանի նախագահին, եւ դրանից հետո աշխատանքը շարունակվել է կոնստրուկտիվ հունով: Պատվիրակության ղեկավարը նաեւ ճիշտ է համարում բաքու գնալը: «Մենք համարում ենք, որ գնալը անպայման պետք էր, որովհետւ Ալիեւը այնպիսի հարված հասցրեց իր երկրի քաղաքական իմիջին, որը մենք որքան էլ ձգտեինք, բարդ կլիներ հաջողել»,- նշեց նա:
Հովհաննիսյանի խոսքով, իրենք գրեթե զրկված են եղել ադրբեջանական մամուլի ներկայացուցիչների հետ շփվելու հնարավորությունից: «Առաջին օրը մի քանի բան ասել էի, բայց հաջորդ օրը պրոտոկոլը ուղղակի վտարել էր լրագրողներին»,- ասաց Վահան Հովհաննիսյանը` միաժամանակ հավելելով, որ, օգտագործելով իր ընդհատակյա հեղափոխական պատրաստվածությունը, մի հարցազրույց տվել է «Խազար» հեռուստաընկերությանը:
Ի դեպ, ՀՅԴ-ական պատգամավորը դրականվերաբերմունք է տեսել հասարակ ադրբեջանցիներից` սպասարկող անձնակազմից, ադրբեջանցի պատգամավորներից, հյուրանոցի աշխատակիցներից, ժողովրդից: «Որեւէ ագրեսիվ վերաբերմունք չտեսանք: Ըստ երեւույթին այդ երկրում մի մարդ կա, ով ատելություն է սերմանում: Ադրբեջանցի ժողովրդի մոտ պատերազմում մեռնելու ցանկություն չտեսա»,- նշել է նա:
Պատվիրակության անդամ, ԲՀԿ-ական Նաիրա Զոհրաբյանն իր հերթին նշեց, թե Ադրբեջանի ժողովուրդը պատանդ է Ալիեւի ձեռքին: Նա նաեւ արձանագրեց եվրոպացի պատգամավորների անհամարձակ կեցվածքը, որ միայն մասնավոր զրույցներում էին դատապարտում Ալիեւի ելույթը, իսկ ամբիոնից փորձ էլ չարեցին բառ ասել:
