«Դուք ինձ հնարավորություն տվեցիք նորովի նայել «նավթ -ցեղասպանություն» բառակապակցությանը` բարոյականության անկում, հայտարարել է կազակների ներկայացուցիչ (կազակների կապելլան) Օլեգ Վասիլյուկը «Սովորական ցեղասպանություն. Մարաղա, 10 ապրիլի 1992» ֆիլմը դիտելուց հետո:
Վասիլյուկը նշել է, որ եթե Ուկրաինայում Հայոց ցեղասպանության զոհերի հիշատակի օր նշվի, դրանով կհարգվի եղբայր ժողովրդի հիշատակը, որը սոսկալի ողբերգություն է ապրել: «Համոզված եմ, որ բոլորը կմիանան Ուկրաինայի իշխանություններին ուղղված մեր դիմումին, որով խնդրում ենք օրենսդրական մակարդակով ապրիլի 24-ը ճանաչել Հայոց ցեղասպանության զոհերի հիշատակի օր», - ասել է նա, գրում է Analitika.at.ua-ը:
Կիեւում ապրիլի 13-ին կլոր սեղան է անցկացվել «Հայոց ցեղասպաննություն. անպատժելիությունը ծնում է կրկնություն» թեմայով, կայացել է «Սովորական ցեղասպանություն. Մարաղա, 10 ապրիլի 1992» ֆիլմի ցուցադրությունը, որը նկարահանել է Հայաստանի նախագահի աշխատակազմի տեղեկատվության եւ հասարակայնության հետ կապերի կենտրոնը:
Կլոր սեղանին մասնակցել են ուկրաինացի հայտնի քաղաքագետներ, գիտնականներ եւ քաղաքական գործիչներ, կազակների ներկայացուցիչներ:
Կլոր սեղանի արդյունքներով ընդունվել է Ուկրաինայի նախագահ Վիկտոր Յանուկովիչին եւ Ուկրաինայի Գերագույն ռադայի ղեկավար Վլադիմիր Լիտվանին ուղղված դիմումը, որում կոչ է արվում ապրիլի 24-ը ճանաչել Հայոց ցեղասպանության զոհերի հիշատակի օր:
