Հայաստանում մայիսի 6-ին կայացած խորհրդարանական ընտրությունների արդյունքները հայ-ռուսական հարաբերությունների ձեւաչափի փոփոխության չեն հանգեցնի: Նման կարծիք է հայտնել քաղաքագետ, Կովկասի ինստիտուտի տնօրեն Ալեքսանդր Իսկանդարյանը` մայիսի 17-ին կայացած «Ընտրությունների արդյունքները Հայաստանում. Ռուս-հայկական երկխոսություն` նոր փո՞ւլ» թեմայով հեռուստակամուրջի ժամանակ:
Ըստ քաղաքագետի` Հայաստանի եւ Ռուսաստանի հարաբերությունները կմնան նախկինի պես` հաշվի առնելով, որ խորհրդարան անցած քաղաքական ուժերից ոչ մեկը կտրականապես հանդես չի գալիս ձեւաչափի փոփոխության պահանջով: Իսկանդարյանը նշել է, որ դա հասկանալի էր նաեւ մինչեւ ընտրությունները: Ըստ փորձագետի` հայ-ռուսական հարաբերությունները թույլ են տալիս Հայաստանին գոյատեւել բարդ տարածաշրջանում:
Ընդհանուր պատմություն, մշակութային կապեր, այդ բոլորը կա, նշել է փորձագետը, ավելացնելով, որ տվյալ պահին ավելի կարեւոր է փոխադարձ հետաքրքրությունը եւ սերտ կապերը: Հայաստանը Ռուսաստանի համար հնարավորություն է Հարավային Կովկասում նշանակալի ուժ մնալու առումով, իսկ Հայաստանի համար Ռուսաստանը անվտանգության հովանոց է Ադրբեջանի եւ Թուրքիայի ոչ այնքան լավ հարաբերությունների ենթատեքստում:
Իսկ ըստ ԱՊՀ երկրների ինստիտուտի հայկական մասնաճյուղի տնօրեն, քաղաքագետ Ալեքսանդր Մարգարովի` անցած նախընտրական քարոզարշավը տարբերվում էր մրցունակության բարձր մակարդակով: Դեռեւս լարվածություն պարունակող հարց է շարունակում մնալ նոր իշխող կոալիցիայի ձեւավորումը: Ալեքսանդր Մարգարովը համաձայնել է գործընկերոջ հետ, որ Ռուսաստանի եւ Հայաստանի հարաբերությունները փոփոխություն չեն կրի: