Երեւանում աղբի վերամշակման ճանապարհով այլընտրանքային էներգիայի ստացման հնարավորությունների, ինչպես նաեւ համապատասխան գործարանի կառուցման հետ կապված առաջարկություններ են քննարկվել Երեւանի քաղաքապետ Տարոն Մարգարյանի` Չեխիայի Առեւտրի պալատի նախագաh Պյոտր Կուզելի հետ տեղի ունեցած հանդիպման ժամանակ, որին ներկա է եղել նաեւ ՀՀ առեւտրաարդյունաբերական պալատի նախագահ Մարտին Սարգսյանը:
Շնորհակալություն հայտնելով ջերմ ընդունելության համար եւ կիսելով իր տպավորությունները Երեւանի մասին` Պյոտր Կուզելը քաղաքապետին է փոխանցել Պրահայի քաղաքապետի ողջույններն ու նրա անունից Չեխիայի մայրաքաղաք այցելելու հրավերը:
Տարոն Մարգարյանը բարձր գնահատելով հայ-չեխական հարաբերություններն ու առեւտրատնտեսական կապերը` ընդգծել է փոխգործակցության խթանմանն ուղղված քայլերի անհրաժեշտությունը:
«Երեւանի քաղաքապետարանը բաց է համագործակցության համար եւ ողջունում է այն բոլոր ներդրումային առաջարկությունները, որոնք ուղղված են ենթակառուցվածքների զարգացմանը: Ձեւավորված բարենպաստ բիզնես միջավայրը հնարավորություն կտա փոխշահավետ ծրագրեր իրականացնել քաղաքային տնտեսության տարբեր ոլորտներում»,-նշել է քաղաքապետը:
Չեխական կողմը պատրաստակամություն է հայտնել համագործակցության եզրեր քննարկել քաղաքային ենթակառուվածքներում տարբեր ծրագրերի շուրջ, առանձնացնելով հասարակական տրասպորտի ոլորտում հնարավոր փոխգործակցության հեռանկարները:
Քաղաքապետ Տարոն Մարգարյանը նշել է, որ աշխատանքային համատեղ խմբի կողմից կքննարկվեն ներկայացվող առաջարկները եւ հավաստիացրել, որ քաղաքապետարանը պատրաստ է աջակցել եւ իր լիազորությունների շրջանակում ընդառաջել, որպեսզի հավանության արժանացած ծրագրերը կյանքի կոչվեն:
