Ղարաբաղյան հիմնախնդրի կողմերը մնացել են խաղաղության եւ պատերազմի սահմանագծին: Նման կարծիք է հայտնել Կարնեգիի Հանուն միջազգային խաղաղության հիմնադրամի ավագ գիտաշխատող Թոմաս դե Վաալը CivilNetTV-ի հարցազրույցում:
Խոսելով Մեքսիկայում ԵԱՀԿ Մինսկւ խմբի համանախագահների արված հայտարարությունների մասին` փորձագետը նշել է, որ դրանում ավելի կարեւոր է եղել սիմվոլիզմը: Առաջին անգամ նման հայտարարություն ընդունվել է G20-ի հանդիպմանը:
Հայ-ադրբեջանական սահմանի դեպքերը ստվեր են նետել ԱՄՆ-ի պետքարտուղարի` Հարավային Կովկաս այցին:
«Այն տպավորությունն է, որ կողմերից մեկը փորձել է ուշադրություն հրավիրել Ղարաբաղյան հիմնախնդրի վրա, եւ դեպքերը համընկել են Քլինթոնի այցին, որը տարածաշրջան էր եկել խաղաղության կոչով», - նշել է փորձագետը:
Տեսակետ գոյություն ունի, որ ԱՄՆ-ը, Ռուսաստանը, Եվրոպան, Թուրքիան, Իրանը շախմատ խաղացողներ են, իսկ հարավկովկասյան տարածաշրջանի երկրները խաղալիք են նրանց ձեռքերում: Սակայն փորձագետը հակառակ կարծիքին է: «Հեշտ է մեղքը բարդել գերտերությունների վրա, ասելով որ մենք չենք կարողանում համաձայնության գալ, քանի որ Հայաստանը, Ղարաբաղը եւ Ադրբեջանը փոքր պետություններ են, եւ գերտերություններն օգտագործում են այդ: Խնդիրն այն է, որ եթե գերտերություններն էլ փորձեն ձեր փոխարեն լուծել ձեր խնդիրները, ապա այդ որոշումներն էլ ձեզ դուր չեն գա», - նշել է դը Վաալը:
