ՀինգշաբթիՀուլիս 31
  • USD 406.57
  • EUR 546.19
  • RUB 11.38

Տխրում եմ, երբ ինձ մոռացված եմ զգում, երբ ինձ կարեւոր չեմ զգում. Լյուդմիլա Սարգս...

05:26, 19.07.2012 Տարածաշրջան: Հայաստան Թեմա: Քաղաքականություն

«Բլից հարցազրույցներ ԱԺ պատգամավորների հետ» շարքի շրջանակներում NEWS.am-ը ներկայացնում է իր հերթական հարցազրույցը: Այս անգամ զրուցել ենք Հայ ազգային կոնգրես խմբակցության պատգամավոր Լյուդմիլա Սարգսյանի հետ:

Ո՞վ եք դուք եւ ինչպիսի՞ն եք:

Ես նախեւառաջ մարդ եմ, քաղաքացի եւ մայր: Ինձ դժվար է դատել, թե ինչպիսին եմ, որովհետեւ սովորաբար ինքդ քեզ չես կարող գնահատել, բայց ես կարծում եմ, որ նորմալ մարդ եմ, աշխատում եմ լավ ընկեր լինել, չդավաճանել իմ սկզբունքներին, լիարժեք կատարել մայրական  պարտականություններս:

Աշխարհը, կյանքը եւ Դուք:

Ես իմ առաքելությունն ունեմ այս աշխարհում, միգուցե փոքրիկ, աննկատ: Իսկ կյանքը իմաստավորված է նրանով, որ այն ունի ավարտ եւ այդ մասին միշտ պետք է հիշել:

Ճակատագիր կա՞, թե՞ մարդը ինքն է տնօրինում իր կյանքը:

Ճակատագիրը նպաստում է նրան, ինչ մարդը ցանկանում է ստեղծել, եւ ընդհանրապես Աստված օգնում է նրան, ինչ մարդն անում է, իսկ ով չի անում, նրան չի էլ կարող օգնել: Ինչ-որ տեղ կա ճակատագրի ձեռքը, բայց սովորաբար մարդ ինքն է իր քայլերով խեղում իր կյանքը, ճակատագիրը եւ դա վերագրում ճակատագրին: Մենք մեղավոր ենք լինում այն ամենում, ինչ տեղի է ունեցել մեր կյանքում եւ ինչը դեռ կարող է լինել:

Ձեր բնավորության ամենաուժեղ կողմը:

Իմ ամենաուժեղ կողմը համառությունն է եւ օպտիմիզմը, ես միշտ հավատում եմ այն ամենին, հանուն ինչի պայքարում եմ եւ աշխատում:

Ձեր թերությունները:

Թերություններ երեւի շատ ունեմ, ամենաարտահայտվածը, որը ես տեսնում եմ, այն է, որ մի քիչ շատ եմ հավատում մարդկանց:

Ձեր ուրախությունը:

Ինձ շատ փոքրիկ առիթներով կարելի է ուրախացնել` վիշտ չլինի եւ հաճելի ժամանակ անցկացնել այն մարդկանց հետ, ում սիրում եմ:

Ձեր տխրությունը:

Տխրում եմ, երբ ինձ մոռացված եմ զգում, երբ ինձ կարեւոր չեմ զգում, լինում են նաեւ նման պահեր:

Ձեր կյանքի ամենամեծ սխալը:

Այդ մասին ես կաշխատեմ լռել:

Ի՞նչ չեք ներում ինքներդ ձեզ:

-Ամենադժվարը ինքդ քեզ ներելը, աշխատում եմ այնպիսի բաներ չանել, որի համար ստիպված պիտի լինեմ ինձ ներել կամ չներել: 

Ի՞նչը կփոխեիք ձեր մեջ:

Միշտ փոխելու ցանկություն կա, երեւի թե 3-4 տարին մեկ աշխատում եմ այնպես փոխվել, որ ինքս ինձ նորովի տեսնեմ, սիրում եմ սանրվածք փոխել, սիրում եմ ոճս կատարելագործել, սիրում եմ, երբ նկատում են, երբ ես փոխվել եմ դեպի լավը:

Ինչի՞ց եք զարմանում:

Անհանդուրժողականությունից, մարդկային չարությունից:

Ձեր մասին ամենամեծ սուտը:

Երեւի թե եղել է, բայց կաշխատեմ այդ մասին չխոսել, որովհետեւ կանանց մասին միշտ կարելի է գտնել այնպիսի սուտ, որին մարդիկ կհավատան:

Լավագույն մարդը:

Հայրս:

Զայրանում եք, երբ…

Ինձ չեն հասկանում, երբ ես ճիշտ եմ, բայց փորձում են իմ ճշմարտությունը չտեսնել, զայրանում եմ, երբ ինձ խաբում են:

Թուլություններ:

Բավական էմոցոինալ եւ զգացմունքային մարդ եմ:

Հոգսեր:

Բազմաթիվ, բազմաբնույթ, բայց տանելի:

Խենթություններ:

Բազմաթիվ, սիրում եմ խենթ լինել, խախտել բոլորի համար ընդունված ինչ-որ բաներ, բայց առանց վնասելու  մեկ ուրիշի:

Հպարտությունը:

Այսօրվա սերնդի լավ հատվածն է, ում հետ կարող ենք երկրի ապագան կապել:

Երջանկությունը:

Երջանկությունը շատ հարաբերական զգացողզություն է, անկանխատեսելի, այսօր երջանիկ ես, վաղը կարող ես լրիվ դժբախտ զգալ, բայց հույս ունենալով, որ վաղը նորից կարող ես երջանիկ լինել: Լիարժեք բացատրություն չունի:

Ամենառոմանտիկ օրը:

Չեմ կարող մտաբերել, երեւի եղել են, ես պահի դրությամբ ուրախացող մարդ եմ, ինձ համար ռոմանտիկ է մի հատ ծաղիկը, որ նվիրում է մարդ, ումից ակնկալում ես:

Չսիրելի զբաղմունքներ:

Այն ինչը չեմ հասկանում, չեմ սիրում զբաղվել, այդպիսի շատ շատ բաներ կան, ես շատ շատ բաներից դեռ ոչինչ չեմ հասկանում:

Սերեր:

Առանց սիրո մարդը իրեն լիարժեք զգալ չի կարող: Ես սիրո բերկրանքը զգալու առիթ ունեցել եմ, երբ մարդը սիրված է, սիրում է եւ կարեւորված է, կարողանում է այդ զգացողությամբ լիարժեք աշխատել, լիարժեք զգալ իրեն: Չեմ կարծում, որ ես այն կանանց տեսակն եմ, որը կարողէ  չսիրել եւ չսիրվել:

Տղամարդիկ:

Շատ կարեոր են մեր կյանքում, ինչպես եւ մենք նրանց, մենք լրացնում ենք նրանց, նրանք` մեզ:

Ընտանիքը:

Ընտանիքը կարեւոր է, եթե այն կայացած է:

Երեխաները:

Երեխաները մեր կյանքի ծաղիկներ են, իսկ ծնողները` երեխաների կյանքի շարժիչ ուժը:

Հաճելի անակնկալ:

Անսպասելի եւ ցանկալի հյուրի այցելություն:

Անելանելի իրավիճակ:

Դա այն իրավիճակն է, երբ ոչինչ չես կարող փոխել, օրինակ` երբ կյանքից գնում են ամենակարեւոր մարդիկ ու դու ոչինչ չես կարող փոխել:

Կինը գեղեցկությա՞մբ, թե՞ խելքով է հասնում հաջողությունների:

Երկուսն էլ պետք է ներկա լինեն կնոջ մեջ: Կնոջ մեջ պետք է լինի արտաքին եւ ներքին գեղեցկություն, հմայք, խելք: Ոչ մի գրոշ չարժե այն գեղեցկությունը, որը չի առաջնորդվում խելքով:

Ամենաթանկ նվերը, որ ստացել եւ նվիրել եք:

Ակնկալում եմ, որ ամենաթանկը ես կստանամ եւ կնվիրեմ:

Ամենաշատն ո՞ւմ եք բարկացնում եւ ո՞վ է ամենաշատը ձեզ բարկացնում:

Երեւի թե կան մարդիկ, ում բարկացնում եմ, նրանք էլ ինն են բարկացնում, բայց ամենաշատ զիջում եմ իմ աղջիկներին:

Երազանքներ:

Ես երազում եմ ունենալ մի երկիր, որտեղից մարդիկ երբեք չցանկանան գնալ, իսկ հեռացողներն էլ մտածեն վերադառնալու մասին: Անձնական բնույթի երազանքների մասին կինը սովորաբար չի խոսում:

Նշենք, որ Լյուդմիլա Սարգսյանը եւս ԱԺ-ում նորաբնակներից է, ամուսնացած է եւ ունի երկու երեխա: Մասնագիտությամբ տեխնիկ, մաթեմատիկոս-ծրագրավորող է, աշխատել է մասնագիտությամբ տարբեր հաստատություններում: 2003թ. Սոցիալ-դեմոկրատ հնչակյան կուսակցության անդամ է, 2004թ.` ատենապետ: Մինչ ՀԱԿ համամասնական ցուցակով պատգամավոր դառնալը ընտրվել էր Երեւանի ավագանու անդամ:

Ավելի վաղ NEWS.am-ը ներկայացրել էր հարցազրույց ԱԺ ՀՀԿ խմբակցության պատգամավոր Արփինե Հովհաննիսյանի,Լեւոն Մարտիրոսյանի, Նաիրա Կարապետյանի, ԲՀԿ խմբակցության պատգամավոր Տիգրան Ուրիխանյանի, Էլինար Վարդանյանի հետ:

Շարքը` Ինգա Մարտինյանի

Լուրեր Հայաստանից - NEWS.am

Այս թեմայով

«Հայկական ժամանակ». Ովքեր են ամենաշատ բացակայող պատգամավորները

Տասնյակում երրորդը Կարեն Կարապետյանն է՝ 43 բացակա: Չորրորդը՝ ԲՀԿ-ական պատգամավոր Արագած Ախոյանն է՝ 28 բացակա, հինգերորդը՝ Գագիկ Ծառուկյանի խնամի, ԲՀԿ-ական պատգամավոր Մուրադ Գուլոյանը՝ 25 բացակա...

«Ժողովուրդ». Կոտայքի մարզի Քասախ համայնքում քաղաքական սկանդալ է հասունանում

Շատ անգամ գնացել խնդրել, պաղատել եմ, թե՝ եկեք աշխատեք, ինչ որ առաջարկում ենք դրեք քննարկեք եւ այլն: Չեկան ու վերջ...

«Հայաստանի նոր քաղաքական մշակույթ»-ը իրական ընդդիմություն է.Անի Զախարյան

Այսօրվա ոչ լեգիտիմ իշխանությունը միմիայն պետք է ուրախ լինի, որ Հայաստանի քաղաքական իրականություն մուտք է գործել ՀՆՔՄԿ, որը առանց որեւէ լծակների...

Անի Զախարյանն առաջարկում է աղջիներին ծառայել բանակում

Ես ինքս երիտասարդ կին եմ, բայց պատանեկան տարիներին երազում էի բանակում ծառայել...

«Ժողովուրդ». Համեստ ապրուստով փոխնախարարները

Ստացվում է, որ Տերտերյանն իր հաշվին ոչ մի դրամ չունի, սակայն նա մեկ տարվա ընթացքում աշխատանքի վարձատրությունից 3 մլն 488 հազար դրամ է վաստակել...

Նոր նշանակումներ ԱԻՆ-ում

Նախարարության տարբեր ստորաբաժանումներում կատարվել են մի շարք նոր նշանակումներ...