ԱՄՆ նախագահ Բարաք Օբաման շնորհավորական ուղերձ է հղել Հայաստանի Անկախության օրվա կապակցությամբ:
Ուղերձում, մասնավորապես, ասված է.
«Մեծարգո պարոն նախագահ,
Իմ ջերմագին բարեմաղթանքներն եմ հղում Ձեզ եւ հայ ժողովրդին Սեպտեմբերի 21-ի ազգային տոնի առթիվ:
Հայաստանը թեւակոխում է իր անկախության 22-րդ տարին, ինչը նշանավորվում է մեր երկու երկրների ու ժողովուրդների միջեւ ամուր ու տեւական կապերով: Միացյալ Նահանգները հաստատակամորեն պատրաստ է աջակցել Հայաստանի շարունակական տնտեսական զարգացմանն ու ժողովրդավարացմանը եւ լիահույս է, որ առաջիկա տարիներին մեր սերտ գործընկերությունն առավել կընդլայնվի: Ժողովրդավարությունը, բարեկեցությունը եւ խաղաղությունը Ձեր երկրում խորացնելու մեր աշխատանքներից զատ՝ մեր համագործակցությունը ներառում է նաեւ համատեղ ջանքեր ընդդեմ համընդհանուր մարտահրավերների, եւ մենք խորապես արժեվորում ենք Հայաստանի մասնակցությունն անվտանգությանն ուղղված միջազգային առաքելություններին Աֆղանստանում ու Կոսովոյում, որտեղ քաջարի հայ զինվորները ծառայում են ՆԱՏՕ-ի առաքելություններում՝ ամերիկյան ուժերի հետ միասին:
Ամերիկան նաեւ մեծապես հարստացել է հայկական ծագում ունեցող ամերիկյան քաղաքացիների ներդրումների շնորհիվ եւ այսօր՝ այս տոնի առիթով, մենք միասին նշում ենք նաեւ մեր ժողովուրդների միջեւ եղած երկարամյա բարեկամական կապերը:
Բոլոր ամերիկացիների անունից ես իմ սրտաբուխ շնորհավորանքներն եմ հղում այս կարեւոր տոնի առթիվ»:
