Արքայազն Հարիին բրիտանական ամենաընթերցվող ամսագրերից մեկի` Tatler-ի վարկածով ճանաչվել է տարվա մարդ:
Եղիսաբեթ թագուհու թոռանն անվանել են «միապետական ընտանիքի ամենահամակրելի եւ խարիզմատիկ ներկայացուցիչ»: Tatler-ի շապիկին արքայազնը բրիտանական ռազմաօդային ուժերի օդաչուի տոնական համազգեստով է: Լրագրողները նրան նկարագրում են իբրեւ առատաձեռն բարեգործ, գրում է «Մոսկովսկի կոմսոմոլեցը»:
Հարին հաճախ է ամսագրերի շապիկներին հայտնվում, բայց միշտ չէ դրական խոսքերի արժանանում: Այդ նույն համարում Tatler-ը «Արքայազն Հարի. Աղջիկներ, խնջույքներ, սխալներ» խորագրով հոդված է հրապարակել:
Հիշեցնենք, այդ «սխալներից» մի քանիսը լուրջ հետեւանքներ էին ունեցել: Օրինակ` Լաս Վեգասի խնջույքում մերկ լուսանկարների պատմությունը:
Ներկայումս Հարին ծառայություն է անցնում Աֆղանստանում`իբրեւ թագավորական ռազմաօդային ուժերի զինծառայող:
«Ժողովրդական արքայադուստր» Դիանայի կրտսեր որդին վերջին 20 տարում առաջին տղամարդն է, ում հաջողվել է Tatler-ի շապիկին հայտնվել: 1992թ. «համարի աստղը» դարձել էր Հարիի հայրը` արքայազն Չարլզը, նշում է NEWSru.com-ը:
