Հայաստանում Ռուսաստանի արտակարգ եւ լիազոր դեսպան Վյաչեսլավ Կովալենկոն առաջարկել է «ինքնուրույն մտածել Հայաստանից ներգաղթի պատճառների մասին»:
Համապատասխան հարցը ռուս դիվանագետին տրվել է հոկտեմբերի 9-ի մամուլի ասուլիսում: Առիթը Հայաստանի վարչապետ Տիգրան Սարգսյանի օրերս արտահայտած դժգոհությունն էր Հայաստանում ռուսական «Հայրենակիցներ» ծրագրի իրականացման կապակցությամբ:
«Մի՞թե հարցը ՌԴ Դաշնային միգրացիոն ծառայության ներկայացուցչությունն է, եթե հայերը ձգտում են Ռուսաստան: Նրանց ստիպողաբա՞ր են այնտեղ տանում», - նկատել է դեսպանը: Ըստ նրա, եթե մարդիկ հեռանում են Հայաստանից, դրա համար օբյեկտիվ պատճառներ ունեն: Եւ դա կապ չունի ԴՄԾ-ի ներկայացուցչության հետ», - ընդգծել է դեսպանը` հիշեցնելով, որ ներկայացուցչության նպատակը անօրինական ներգաղթը սահմանափակելն է, գնացողներին պաշտպանելը, նրանց համար նորմալ կենսապայմաններ եւ աշխատավարձ ապահովելը:
«Հայերին ոչ ոք ստիպողաբար Ռուսաստան չի քշում: Եթե ԴՄԾ-ի ներկայացուցչությունը փակվի, ներգաղթը դրանով չի դադարի», - նշել է Վյաչեսլավ Կովալենկոն:
Հարցի արդիականության առնչությամբ դեսպանն առաջարկել է հետաքրքրվել, թե Հայաստանից գրին քարտով քանի մարդ է հեռացել ԱՄՆ:
«Գրին քարտով Հայաստանն ավելի շատ մարդ է լքել, քան ԴՄԾ-ի միջոցով: 2007թ.-ից մինչ օրս ընտանիքներով 5 հազարից ավելի մարդ ԱՄՆ է մեկնել, ԴՄԾ-ի գծով` 5 հազարից քիչ: Ինչի՞ համար է աղմուկը: Ինչի՞ մասին է խոսքը», - հարցրել է դեսպանը:
Ռուս դիվանագետի կարծիքով`նման հարցը, մեղմ ասած, ոչ միայն կոռեկտ չէ, այլեւ այնքան էլ խելացի չէ: «Նախքան նման հարց տալը, պետք է ծանոթանալ վիճակագրական տվյալներին», - խորհուրդ է տվել Վյաչեսլավ Կովալենկոն:
Լուսանկարը` Սոնա Բարսեղյանի