Տասնամյա դադարից հետո բեմ վերադարձած իտալացի հայտնի երգիչ Ադրիանո Չելենտանոն իր համերգը վերածել է քաղաքական շոուի: Իհարկե, նաեւ երգել է, երբ ձանձրացած հանդիսատեսն սկսել է սուլել: Երգչի հյուրն է եղել ֆրանսիացի հայտնի տնտեսագետ Ժան Պոլ Ֆիտուսին:
Ադրիանո Չելենտանոն 2 ժամից ավելի ելույթ է ունեցել Վերոնայի «Արենա» բեմում, որն ավելի շատ հայտնի է որպես դասական օպերայի հարթակ, հայտնում է ԻՏԱՌ-ՏԱՍՍ-ը:
Չելենտանոյի շոուին հրավիրված է եղել նաեւ իտալացի այլ հայտնի երգիչ Ջանի Մորանդին:
Համերգի ընթացքում Ֆիտուսիի հետ Չելենտանոն քննարկել է ժամանակակից աշխարհի տնտեսական անարդարությունը, որը ոտնահարում է քաղաքացիների ժողովրդավարական իրավունքները: Սակայն երբ Չելենտանոն ու հյուրը տարվել են զրույցով, հանդիսատեսն սկսել է սուլել եւ երաժշտություն պահանջել:
Եվ երգիչը չի հիասթափեցրել, երգել է ինչպես իր հին հիթերը, այնպես էլ նոր երգեր վերջին ձայնասկավառակից, որը թողարկվել էր նախորդ տարվա դեկտեմբերին:
