Ամերիկացիների մեծամասնությունը կարծում է, որ հոկտեմբերի 11-ին տեղի ունեցած ԱՄՆ-ի փոխնախագահների թեկնածուների հեռուստաբանավեճում հաղթել է հանրապետական Փոլ Ռայանը: Նման տվյալներ է ներկայացնում CNN- ը` իր հեռուստադիտողների շրջանակում իրականացրած հարցման արդյունքում, որոնցից 48 տոկոսը առավել համոզիչ է համարել Ռայանի ելույթը, իսկ 44 տոկոսին դուր է եկել Բայդենի ելույթը:
Մեկ այլ հեռուստաընկերության` CBS-ի հարցման արդյունքներով բանավեճում հաղթանակ է տարել Ջոզեֆ Բայդենը: Այս մասին հայտնում է ԻՏԱՌ-ՏԱՍՍ-ը:
Այս կապակցությամբ ինտերնետի օգտատերերը քննադատել են CNN-ին, ովքեր դժգոհ են հարցման արդյունքներից: Նրանց մեծամասնության կարծիքով բանավեճը միանշանակ հաղթել է Բայդենը:
Բանավեճը Փոլ Ռայանի եւ Ջոզեֆ Բայդենի միջեւ տեղի է ունեցել Կենտուկի նահանգի Դանվիլ քաղաքում: Թեկնածուները կես ժամվա ընթացքում քննարկել են ներքին եւ արտաքին քաղաքականությանը վերաբերող հարցեր:
Ավելի վաղ ուղիղ եթերում հեռուստաբանավեճ են ունեցել նաեւ Բ. Օբաման եւ Միթ Ռոմնին, որտեղ հաղթող է ճանաչվել վերջինս: Հաջորդ բանավեճը տեղի կունենա հոկտեմբերի 16-ին եւ 22-ին: