Հայաստանի փոխվարչապետ, Տնտեսական համագործակցության հարցերով հայ-իրաքյան միջկառավարական համատեղ հանձնաժողովի համանախագահ Արմեն Գեւորգյանի եւ Իրաքյան Քուրդիստանի վարչապետ Նեչիրվան Իդրիս Բարզանիի` նոյեմբերի 8-ին Էրբիլում կայացած հանդիպմանը քննարկվեցին առեւտրատնտեսական հարաբերությունների հաստատման եւ զարգացման հարցեր:
ՏԿՆ հասարակայնության հետ կապերի բաժնից հայտնում են, որ կողմերն անդրադարձան փոխգործակցության ուղղություններին եւ հեռանկարային ոլորտներին: Երկուստեք արձանագրվեց, որ առկա են համագործակցության լայն հնարավորություններ`սկսած նավթագազային որոտից մինչեւ հայկական ապրանքատեսակների արտահանում իրաքյան շուկա:
Առանձնահատուկ կարեւորվեց էներգետիկայի, տրանսպորտային հաղորդակցության ոլորտներում գործակցությունը: Կողմերը նշեցին նաեւ փոխայցելությունների կարեւորությունը, գործարար շփումների խրախուսումը, ինչպես նաեւ անհրաժեշտ իրավապայմանագրային դաշտի ձեւավորումը:
Անդրադարձ եղավ Տնտեսական համագործակցության հարցերով հայ-իրաքյան միջկառավարական համատեղ հանձնաժողովի աշխատանքներին նաեւ Քուրդիստանի կառավարության ներկայացուցիչներին հաղորդակից դարձնելու հնարավորությանը:
