Google-ը նոյեմբերի 12-ին նշում է ժամանակակից քանդակի հիմնադիրներից մեկի՝ Օգյուստ Ռոդենի ծննդյան տարեդարձը: Որոնիչի լոգոտիպի երկրորդ «o» տառը փոխարինված է քանդակագործի ամենահայտնի «Մտածողը» քանդակով:
Ֆրանսուա Օգյուստ Ռոդենը ծնվել է 1840 թվականի նոյեմբերի 12-ին Փարիզում: Մանուկ հասակում մաթեմատիկական հակումներ է ունեցել եւ ընդունվել նկարչության եւ մաթեմատիկայի փարիզյան դպրոց: Ռոդենի դեբյուտը տեղի է ունեցել 1864թ. փարիզյան Սալոնում. նրա «Կոտրված քթով մարդը» գործը ձախողվել է: Ապագա քանդակագործին չեն ընդունել նաեւ Գեղարվեստի դպրոց: Այդ պատճառով էլ գրեթե 13 տարի Ռոդենը վաստակել է հարուստ առանձնատների համար դեկորատիվ քանդակներ ստեղծելով:
Դանտեի «Աստվածային կատակերգությունը» դարձել է ռոդենյան «Դժոխքի դարպասները» քանդակի հիմքը, որի վրա քանդակագործն աշխատել է ամբողջ կյանքում: Ռոդենին հռչակ բերած «Մտածողը» ինչպես նաեւ նրա հայտնի «Համբույր», «Եվա» աշխատանքներն ընդամենը «Դժոխքի դարպասները» կոթողային ստեղծագործության էտյուդներն են եղել:
Ինչպես եւ շատ ստեղծագործողներ, Ռոդենը եւս բավական սիրառատ է եղել: Նրա մուսաներից էին երիտասարդ Կամիլա Քլոդելը եւ կյանքի ուղեկցուհի Ռոզ Բյորեսը, որը վարպետին որդի էր պարգեւել, գրում է Calend.ru-ն:
Մեր օրերում Ռոդենի աշխատանքները կարելի է տեսնել Փարիզի, Ֆիլադելֆիայի, Նյու Յորքի, Սանկտ Պետերբուրգի եւ Մոսկվայի թագարաններում: Օգյուստ Ռոդենը մահացել է 1917թ. նոյեմբերի 17-ին:
