Երեւանի քաղաքապետ Տարոն Մարգարյանը դեկտեմբերի 20-ին Հանրապետության հրապարակում կվառի Հայաստանի գլխավոր տոնածառի լույսերը: Մինչ այդ այն արդեն վերջնական տոնական տեսքի բերված կլինի: Այդ մասին այսօր՝ դեկտեմբերի 11-ին կայացած մամուլի ասուլիսում հայտնել է Երեւանի քաղաքապետարանի աշխատակազմի արտաքին ձևավորման և գովազդի վարչության պետ Արազ Բաղդասարյանը:
Նրա խոսքով, Նոր տարվա 32 մետրանոց խորհրդանիշը եղեւնու շուրջ 6 հազար ճյուղերից է պատրաստված, որոնք մայրաքաղաք են բերվել անրապետության ողջ տարածքից. օգտագործվել են անտառների սանիտարական էտից մնացած ճյուղերը: Դեկտեմբերի 20-ի երեկոյան մայրաքաղաքը վերջնական տոնական տեսք կստանա: «Երեւանցիներին եւ հյուրերին ամանորյա անակնկալներ են սպասվում: Բացի արդեն առկա 100 լուսադիոդային լամպերից, Երեւանին տոնական տեսք կհաղորդեն լուսադիոդային ծառերը, կենդանիները, երկու վայրերում եռաչափ պրոյեկցիաներ կտեղադրվեն՝ մեկը Ազատության հրապարակում, մյուսի վայրն առայժմ գաղտնի է պահվում: Երեւանցիներին եւ հյուրերին այլ անակնկալներ էլ են սպասվում», - ասել է Բաղդասարյանը:
Ազատության հրապարակում (Թատերական հրապարակ) դեկտեմբերի 22-ից հունվարի 13-ը երեխաների համար ժամանցային ծրագրեր կկազմակերպվեն: Ազատության եւ Ազնավուրի հրապարակներում լուսադիոդային շատրվաններ կտեղակայվեն:
Նոր տարվա տոնակատարությունների համար Երեւանի քաղաքապետարանը քաղաքային բյուջեից 20 մլն դրամ կծախսի: Սակայն, ըստ Բաղդասարյանի, քաղաքապետարանի գործընկերները եւս գումարներ կհատկացնեն:
