Մոսկվայում ձերբակալվել է Ռուսաստանի պետական գույքի կառավարման Մոսկվայի գծով նախկին ղեկավար Անատոլի Շեստերյուկը: Նրան կասկածում են 10 մլրդ ռուբլի ընդհանուր արժեքով անշարժ գույքի 100 օբյեկտների հափշտակման փորձի մեջ: Շեստերյուկին ձերբակալել են դեկտեմբերի 24-ին: Նույն օրը նրա երեք բնակարաններում եւ նախագահի աշխատակազմի առողջարանի տարածքի առանձնատանը խուզարկություն է կատարվել:
Շեստերյուկը Ռուսաստանի պետական գույքի կառավարման մեքենայությունների գործով երրորդ ձերբակալվածն է: Սեպտեմբերին կալանավորվել էին «Մոսկովյան կապիտալ» բանկի խորհրդի նախկին նախագահ Վիկտոր Կրեստինը եւ «Պրոեկտ» ընկերության փոխտնօրեն Օլգա Վոզնյակը: Եվս մեկ կասկածյալ՝ «Գրան» հաստատության նախկին գլխավոր տնօրեն Ալեքսեյ Վոլկովը փախել է, նրա նկատմամբ հետախուզում է հայտարարվել:
Օպերատիվ քննության ընթացքում պարզվել է, որ Կրեստինը եւ Վոզնյակը մասնակցել են մայրաքաղաքի կենտրոնում տեղակայված 100-ից ավելի պատմամշակութային ժառանգության օբյեկտների հափշտակման փորձին, որոնց մեծ մասը պետության պահպանության տակ է:
Քննության վարկածով՝ չարագործները «Մոսկովյան կապիտալ» բանկում գրավ էին դրել պատմամշակութային արժեք ներկայացնող շինությունները: Բանկի սնանկացումից հետո դրանք օտարման վտանգի առջեւ էին հայտնվել:
Միաժամանակ Դաշնային պետական ունիտար ձեռնարկություններից շատերը հայտարարել են, որ իրենց աշխատանքից հեռացնելու սպառնալիքով ստիպել են ստորագրել «Մոսկովյան կապիտալ» բանկում օբյեկտների գրավադրման փաստաթղթերը: «Կոմերսանտը» գրում է, որ Շեստերյուկը հրաժարվողներին փոխարինում էր իր օգնականներով, վարորդներով, որոնք առանց ավելորդ խոսքերի ստորագրում էին անհրաժեշտ փաստաթղթերը:
«Նովայա գազետայի» տվյալով՝ Անատոլի Շեստերյուկը Վլադիմիր Պուտինի համակուրսեցին է: Լենինգրադում էլ բնակվել է ապագա նախագահի հարեւանությամբ:
