ԱՄՆ դեսպան Ջոն Հեֆերնը հերթական տեսագրությունն է տարածել իր տեսաբլոգում: Այս անգամ նա պատմել է «Աջակցող ձեռքեր» նախագծի մասին` հանրային նախաձեռնության, որ ստեղծվել է դեսպանի եւ նրա կնոջ` Լիբբիի կողմից Երեւանում ԱՄՆ դեսպանատանը:
«Աջակցող ձեռքեր»-ում ընդգրկված են դեսպանատան մի խումբ հայ եւ ամերիացի աշխատակիցներ, որոնք բարեգործական նախագծեր են իրականացնում Հայաստանի մարզերում: «Մինչ օրս մենք իրականացրել ենք մի քանի ծրագրեր առողջապահության, բնապահպանության եւ հաշմանդամություն ունեցող երեխաների հետ աշխատելու ասպարեզում»,- նշել է դեսպանը:
Լիբբի Հեֆերնի խոսքով, երկու ամիսը մեկ անգամ դեսպանատունը կազմակերպում է թխվածքների վաճառք, որ գումար հավաքի բարեգործական նպատակներով:
Անցած տարի դեսպանատան աշխատակիցներն այցելել են Խարբերդի մանկատուն, նաեւ Լուկաշին համայնքի դպրոց, որտեղ վերանորոգման աշխատանքներ են իրականացրել: Դեսպանատան աշխատակիցները նաեւ հագուստներ են հավաքել, որոնք բաժանվելու են գյուղերում:
