Ադրբեջանի արտաքին գործերի փոխնախարար Արազ Ազիմովի վերջին հայտարարությունը ցույց տվեց, որ միջազգային հարության ջանքերը պտուղ են տվել: Այս մասին NEWS.am-ի թղթակցի հետ հարցազրույցի ժամանակ հայտարարեց Լեռնային Ղարաբաղի Հանրապետության նախագահի մամուլի քարտուղար Դավիթ Բաբայանը:
Նրա խոսքով` փոխնախարարի հայտարարությունները մատնանշում են մի շարք միտումներ: «Ամենագլխավորն այն է, որ միջազգային հանրության ջանքերը պտուղ են տվել եւ Ադրբեջանը ֆաշիստական հռետորությունը փոխարինել է շովինիստականով»,-նշեց Դավիթ Բաբայանը:
Մեկնաբանելով Արազ Ազիմովի արտահայտությունն այն մասին, որ Ստեփանակերտի օդանավակայանի աշխատանքները «կվիրավորեն Խոջալուում սպանված ադրբեջանցիների հիշատակը», ԼՂՀ նախագահի մամուլի քարտուղարը նման մոտեցումը դեմագոգիա անվանեց: «Այդ տեսանկյունից ստացվում է, որ Բաքվի «Բինա» օդանավակայանի աշխատանքը վիրավորում է այն հարյուր հազարավոր հայերին, որոնք ապրել ու աշխատել են Բաքվի բարգավաճման համար, սակայն հետո հարկադրաբար լքել են քաղաքը, կամ սպանվել են կազմակերպված կոտորածի ժամանակ: Մեկը մյուսի հետ կապելու փորձը ցույց է տալիս Ադրբեջանի ներսում տիրող ծանր բարոյահոգեբանական իրավիճակը»,- նշեց Դավիթ Բաբայանը: Միեւնույն ժամանակ նա անընդունելի է համարում միտումների շարունակությունը, որոնց պատճառով օդանավակայանի թեման որոշ քաղաքական գործիչների, քաղաքագետների եւ լրատվամիջոցների համար շոուի է վերածվել:
Ստեփանակերտի օդանավակայանի աշխատանքները վերականգնելու նախաձեռնություններն Ադրբեջանում հիստերիկ արձագանքներ են առաջ բերել: Այնտեղից անընդհատ սպառնում են «պայթեցնել» կամ «հարկադրաբար վայրէջքի տանել» Ստեփանակերտ թռչող օդանավերը: Վերջերս Ադրբեջանի կառավարությունն այդ սպանալիքները կյանքի կոչելու համար «իրավական բազա» ապահովող որոշում է ընդունել:
Երեւան կատարած այցի շրջանակում, պատասխանելով NEWS.am-ի թղթակցի հարցին, Նիկոլայ Բորդյուժան կարծիք էր հայտնել, որ Ադրբեջանի կողմից հնչած` հայկական օդանավերի պայթեցման սպառնալիքները կամ անհաջող մեկնաբանություն են եղել, կամ` անհաջող կատակ: ՀԱՊԿ գլխավոր քարտուղարը նշել էր, որ Ադրբեջանին քաղաքակիրթ պետություն է համարում, որտեղ նման որոշումներ ընդունել չեն կարող:
Այդ հայտարարությանն ի պատասխան` Ադրբեջանի արտաքին գործերի փոխնախարար Արազ Ազիմովը փետրվարի 4-ին «հստակեցրել է», որ Ադրբեջանի իշխանությունները չեն պատրաստվում քաղաքացիական ինքնաթիռներ ռմբակոծել:
