Աշխարհում գիտական ամենախոշոր Fundamental Physics Prize մրցանակի դափնեկիրներ են դարձելԱլեքսանդր Պոլյակովը Պրինստոնից, Սթիվեն Հոքինգը եւ Միջուկային հետազոտությունների եվրոպական կենտրոնի (CERN) գիտնականների խումբը, հայտնում է նախկին ֆիզիկոս Յուրի Միլների հիմնադրած մրցանակի կազմկոմիտեն:
Պոլյակովը դափնեկիր է դարձել «Ֆիզիկայի առաջատար» անվանակարգում` միասնական դաշտային եւ լարային տեսութունների բնագավառներում աշխատանքների համար: 3 միլիոն դոլարի չափով երկու հատուկ մրցանակ են ստացել Սթիվեն Հոքինգը եւ յոթ գիտնականներից բաղկացած խումբը:
Մրցանակ են ստացել նաեւ Չարլզ Քեյնը, Լաուրենս Մոլենքամփը եւ Շոուչեն Չժանը` տեսական եւ փորձարարական կանխատեսումների համար: Ջոզեֆ Պոլչինսկին մրցանակ է ստացել քվանտային եւ լարային տեսության մեջ ունեցած ներդրման համար: Նրանք բոլորը կստանան 300 հազարական դոլար: Մրցանակներ են շնորհվել նաեւ «նոր հորիզոններ» անվանակարգի դափնեկիրներին` երեք գիտնական ստացել են 100 հազարական դոլար:
Մրցանակաբաշխությունը տեղի է ունեցել Ժնեւի Միջուկային հետազոտությունների եվրոպական կենտրոնի (CERN) գլխավոր գրասենյակում:
BFM.RU-ն գրում է, որ Ալեքսանդր Պոլյակովը սկզբնապես աշխատել է Չերնոգոլովկեի Լ. Լանդաուի անվան Տեսական ֆիզիկայի ինստիտուտում: 1989թ.-ից նա աշխատում է Պրիստոնի համալսարանում:
«Ռոսիյսկայա գազետան» հայտնում է, որ 67-ամյա Պոլյակովը մտադիր է գումարը ծախսել աուտիզմով տառապող որդու բուժման համար:
