Հայաստանի Հանրապետության քաղաքացիական ավիացիայի գլխավոր վարչությունը կթույլատրի դեպի Ստեփանակերտ քաղաքացիական օդանավերի թռիչքները: Այդ մասին այսօր՝ մարտի 28-ին լրագրողների հետ հանդիպման ժամանակ ասաց ՀՀ կառավարությանն առընթեր քաղաքացիական ավիացիայի գլխավոր վարչության պետ Արտյոմ Մովսիսյանը:
«Թռիչքները լինելու են միջազգային կազմակերպությունների կանոններին ու պահանջներին համապատասխան; Մենք այդ կանոններից մի քայլ չենք ուզում շեղվել: Շատ բան կախված է Լեռնային Ղարաբաղի ավիացիոն իշխանությունների ակտիվ աշխատանքից, եթե իրենք ավարտեն աշխատանքները, մենք պատրաստ ենք»,- ասաց Ա. Մովսիսյանը: Սակայն նա հրաժարվեց կոնկրետ ժամկետներ նշելուց, ասելով, որ դա անշնորհակալ գործ է:
Ա. Մովսիսյանի տեղեկացմամբ՝ Ստեփանակերտի օդանավակայանը լավն է ու գեղեցիկ, փոքր է, սակայն դա բավարար է ուղեւորափոխադրումների համար; Թռիչքուղին լավ վիճակում է, թռիչքային անվտանգության տեսանկյունից չափանիշները լիովին բավարար են, սակայն կան մի քանի ոչ մեծ լուծելի տեխնիկական խնդիրներ՝ կապված օդանավերի սպասարկման հետ;
Ա. Մովսիսյանը նշեց, որ Արցախը օդանավեր չունի, թռիչքները կիրականացնեն հայաստանյան օդանավերը՝ 19 տեղանոց: Թռիչքի տեւողությունը՝ 45-50 րոպե:
