Վարչապետի պաշտոնակատար Տիգրան Սարգսյանն ընդունել է Վրաստանի արտաքին գործերի նախարար Մայա Փանջիկիձեին:
Կառավարության մամուլի ծառայությունից նշում են, որ զրուցակիցներն ընդգծել են Հայաստանի եւ Վրաստանի կառավարությունների միջեւ ձեւավորված ջերմ հարաբերությունները եւ նշել, որ երկու երկրների միջեւ անլուծելի հարցեր չկան: Տիգրան Սարգսյանը շնորհակալություն է հայտնել Վրաստանի կառավարությանը՝ հայկական կողմի բարձրացրած խնդիրներին օպերատիվ արձագանքելու եւ լուծումներ գտնելու համար:
Մայա Փանջիկիձեն Տիգրան Սարգսյանին է փոխանցել Վրաստանի վարչապետ Բիձինա Իվանիշվիլիի ջերմ ողջույնները:
Անդրադառնալով տնտեսական հարաբերություններին՝ Տիգրան Սարգսյանը կարեւորել է երկու հարեւան երկրների միջեւ միասնական շուկայի ձեւավորումը, ինչը կնպաստի երկկողմ բիզնես նոր ծրագրերի իրականացմանը եւ ընդլայնմանը: Այդ համատեքստում, կողմերն անդրադարձել են գյուղատնտեսության, տրանսպորտի եւ տնտեսության այլ ճյուղերում համագործակցությանը, սահմանային անցակետերի արդիականացման ծրագրի ընթացքին, այնտեղ միասնական ծառայությունների մատուցման հնարավորությանը եւ նոր տեխնոլոգիաների ներդրմանը:
Անդրադառնալով մշակութային ոլորտում համագործակցությանը՝ Վրաստանի ԱԳ նախարարը տեղեկացրել է, որ Վրաստանում գտնվող հայկական հուշակոթողների վերականգնման ծրագիրն իրականացվում է հայկական համայնքի մասնակցությամբ:
Կողմերը քննարկել են նաեւ ԵՄ-ի եւ ԱՊՀ-ի շրջանակներում տեղի ունեցող ինտեգրացիոն գործընթացներին առնչվող հարցեր:
