Իրականությանը չեն համապատասխանում տեղեկությունները՝ մանկապարտեզներին ներմուծված թռչնամսի մատակարարման վերաբերյալ, քանի որ Երեւանի քաղաքապետարանի ենթակայության մանկապարտեզների կողմից կազմակերպվող ձեռքբերման գործընթացների համաձայն մատակարավել է բացառապես Արաքս եւ Բաղրամյանի թռչնաֆաբրիկաների կողմից արտադրված թռչնամիս: Այս մասին հաղորդագրություն է տարածել Երեւանի քաղաքապետարանը:
«Ապահովելով կենդանական ծագման մթերքի անվտանգության կանոնները, Երեւանի քաղաքապետարանի ենթակայության մանկապարտեզներին մատակարարվում է միայն սպանդանոցային ծագման միս եւ մսամթերք:
Ի դեպ, Երեւանի քաղաքապետարանի վերահսկողության եւ հանրակրթության վարչությունները պարբերաբար ուսումնասիրություններ են կատարել եւ շարունակում են կատարել՝ մանկապարտեզներում մատակարարվող սննդի կազմակերպման գործընթացի վերաբերյալ»,-ասված է հաղորդագրության մեջ:
