Եվրոպայի ճակատագիրը վճռվում է եվրոպական գլխավոր երկրների մայրաքաղաքներում` Բրյուսելում, Փարիզում, Բեռլինում, ոչ երբեք Ադրբեջանում: NEWS.am-ի թղթակցի հետ զրույցում այս մասին ասաց Գլոբալիզացիայի եւ տարծաշրջանային հետազոտությունների կենտրոնի ղեկավար, քաղաքագետ Ստեփան Գրիգորյանը` մեկնաբանելով Վրաստանի նախագահ Միխայիլ Սահակաշվիլիի այն հայտարարությունը, թե տարածաշրջանի ապագան որոշվում է Ադրբեջանում:
Քաղաքագետն այդ հայտարարությունը համարեց Վրաստանի նախագահի հերթական էքստրավագանտ հայատարարություններից մեկը, որոնցով նա հանդես էր գալիս վերջին խորհրդարանական ընտրություններից հետո: «Չեմ կարծում, որ Եվրոպայի ճակատագիրը վճռվում է Ադրբեջանում, Եվրոպայի ճակատագիրը վճռվում է եվրոպական գլխավոր երկրների մայրաքաղաքներում` Բրյուսելում, Փարիզում, Բեռլինում, Պրահյում, Վարշավայում, բայց ոչ երբեք Ադրբեջանում»,-եզրափակեց քաղաքագետը:
Հիշեցնենք, որ Վրաստանի նախագահ Միխայիլ Սահակաշվիլին օրերս Բաքվում Հարավկովկասյան համաժողովին մասնակցելու ժամանակ հայտարարել էր, թե տարածաշրջանի ապագան որոշվում է Ադրբեջանում: «Դա ոչ միայն Ադրբեջանի, այլեւ Վրաստանի, Ուկրաինայի եւ Մոլդովայի եւ, առհասարակ, հետխորհրդային երկրների անկախության հարցն է: Եվրոպայի անվտանգության եւ աշխարհի ազատության ճակատագիրը այժմ լուծվում է այս տարածաշրջանում՝ Ադրբեջանում»,-հայտարարել էր Սահակաշվիլին:
Նրա խոսքով, տարածաշրջանում կան բացասական ուժեր, որոնք շահագրգռված են Ադրբեջանում իրավիճակի ապակայունացմամբ. «Սա մտացածին հարց չէ: Մենք դա մեզ վրա զգացել ենք Վրաստանում: Այդ ուժերը կանեն ամեն բան, որպեսզի այն առաջընթացը, որին հասել է Ադրբեջանը, դադարեցվի եւ չշարունակվի: Քանի որ այդ գործընթացը թույլ չի տալիս հանգիստ քնել նրանց, ովքեր իրենց չեն պատկերացնում առանց կայսերական ամբիցիաների»: