Մոսկվան ու Երեւանը մտահոգ են Մերձմոսկվայի ողբերգության շահարկումների փորձերի կապակցությամբ, դրանք հակասում են հայ-ռուսական բարեկամական ոգուն: Այս մասին ասվում է ՌԴ ԱԳՆ մամուլի հաղորդագրությունում, որը հրապարակվել է ԱԳՆ փոխնախարար Գրիգորի Կարասինի եւ ՌԴ-ում Հայաստանի դեսպան Օլեգ Եսայանի հանդիպման արդյունքում:
Հանդիպման ընթացքում քննարկվել են երկկողմ համագործակցությանը վերաբերող մի շարք արդիական հարցեր, ինչպես նաեւ արտաքին քաղաքական գերատեսչություններ փոխգործակցությունը: Անդրադարձ է կատարվել նաեւ Պոդոլսկի մերձակայքում տեղի ունեցած վթարին, որի մասնակիցն է եղել նաեւ Հայաստանի քաղաքացի Հրաչյա Հարությունյանը:
Հիշեցնենք, որ «Նոր Մոսկվայում» վթարը տեղի է ունեցել հուլիսի 13-ին: Մանրաքար տեղափոխող «ԿամԱԶ»-ը մեծ արագությամբ բախվել է ուղեւորատար ավտոբուսին: Տեսագրությունում երեւում է, որ բեռնատարի վարորդը փորձել է խուսափել վթարից՝ կտրուկ կերպով կողք թեքելով ավտոմեքենան: Ողբերգական միջադեպի արդյունքում զոհվել է 18 մարդ, մոտ 50 մարդ տարբեր աստիճանի վնասվածքներով հիվանդանոց է տեղափոխվել: Հայաստանի քաղաքացի Հրաչյա Հարությունյանը դատարան է տարվել կանացի ծաղկավոր խալաթով:
Հարությունյանը Բոտկինի հիվանդանոցում էր, սակայն հետաքննության պահանջով՝ բժիշկները նրան դուրս են բերել դեղորայքային քնից: Նրան առանց սափրվելու, հողաթափերով եւ կանացի խալաթով դատարան են բերել: Այդ փաստը հարուցել էր հայ հասարակության բուռն դժգոհությունը, եւ Հայաստանում Ռուսաստանի դեսպանատան առջեւ բողոքի ակցիաներ են կազմակերպվել:
