Ամբողջ աշխարհն է ճանաչել, ինչո՞ւ Ուկրաինան չճանաչի Հայոց ցեղասպանությունը: Այս մասին Analitika.at.ua-ի հետ զրույցում հայտարարել է հայտնի իրավապաշտպան Տատյանա Մոնտյանը՝ խոսելով Գերագույն ռադայում Հայոց ցեղասպանության ճանաչման մասին:
Իրավապաշտպանը հայտնել է, որ լիովին սատարում է Գերագույն ռադայի կողմից Հայոց ցեղասպանության ճանաչման նախաձեռնությունը՝ հավելելով, որ «ամբողջ աշխարհն է ճանաչել այն, ինչո՞ւ Ուկրաինան չճանաչի»:
Նշենք, ուկրաինացի պատգամավորները, մտավորականության, փորձագիտական շրջանակների ներկայացուցիչները եւ հասարակական կազմակերպությունները ակտիվ կերպով Ուկրաինայի խորհրդարանի կողմից Հայոց ցեղասպանության ճանաչման մասին հայտարարություններ են հնչեցնում:
Ուկրաինացի փորձագետ, Իրավիճակների մոդելավորման գործակալության փոխտնօրեն Ալեքսեյ Գոլոբուցկիի խոսքով՝ հասկանալի է, որ Հայոց ցեղասպանության ճանաչումն անհրաժեշտ է:
«Հայերի օրինակը ցույց է տալիս, որ ազգային ողբերգությունն ազգին ավելի է ուժեղացնում: Հատկապես, ելնելով սեփական ժողովրդի օրինակից», - ամփոփել է փորձագետը:
Նշենք, որ Ուկրաինայի Գերագույն ռադայում հունիսի 6-ին Օսմանյան կայսրությունում Հայոց ցեղասպանության ճանաչման մասին օրինագիծ էր գրանցվել: Նախաձեռնության հեղինակները պատգամավորներ Վիլեն Շատվորյանն (Ռեգիոնների կուսակցություն) ու Արսեն Ավակովն («Բատկիվշչինա») են:
Նախաձեռնությանն իր աջակցությունն է հայտնել Հայաստանի ԱԳՆ-ն: