Ամերիկյան Microsoft ընկերությունը ֆիննական Nokia ընկերությունից գնում է սարքերի արտադրման եւ ծառայությունների մշակման բիզնեսը: Գործարքի գումարը կկազմի 7,17 միլիարդ դոլար:
Գործարքն ընդգրկում է բջջային հեռախոսների արտադրության եւ ընկերության պատենտների իրավունքների օգտագործման ձեռքբերումը, հայտնում է gazeta.ru -ն` վկայակոչելով The New York Times-ը:
Սպասվում է, որ գործարքը կավարտվի 2014թ. առաջին եռամսյակում, պայմանով, որ այն հավանություն կստանա Nokia-ի բաժնետերերի եւ կարգավորող մարմինների կողմից, հաղորդում է polit.ru-ն` վկայակոչելով Reuters-ը:
Բջջային բիզնեսը վաճառելուց հետո Nokia-ն մտադիր է ուշադրությունը կենտրոնացնել բիզնեսի այլ ուղղությունների վրա, մասնավորապես` քարտեզների եւ նավիգացիոն համակարգերի ստեղծման, հայտնում է rbc-ն: Nokia-ն Microsoft-ի հետ համագործակցել է 2011թ.` որպես բջջային օպերացիոն համակարգ օգտագործելով Windows Mobile-ը:
Բջջային հեռախոսների շուկայում երբեմնի առաջատար ֆիննական ընկերությունը վերջին տարիներին ճգնաժամ էր ապրում` պարտվելով Samsung-ին եւ Apple-ին: 2013թ. երկրորդ քառորդում Nokia հեռախոսների վաճառքն անկում էր ապրել: