Twinning ծրագրի կասեցման մասին պնդումները չեն համապատասխանում իրականությանը: Այդ մասին հաղորդագրություն է տարածել Հայաստանում Եվրամիության պատվիրակության մամլո ծառայությունը:
«Հաշվի առնելով Հայաստանի կողմից ընդունված վերջին որոշումը, մեզ բնականաբար անհրաժեշտ է վերանայել ԱԱ/ԽՀԱԱՀ-ի ստորագրմանն անմիջականորեն առնչվող ծրագրերը, եւ Հայաստանի ղեկավար մարմինների հետ միասին որոշել հետագա գործողությունները: Այնուամենայնիվ, ինչպես արդեն հայտարարվել է, այս փուլում մենք շարունակում ենք գնահատել ներկա իրավիճակը, տեղեկացնել եւ խորհրդակցել անդամ պետությունների հետ: Մենք նաեւ հետումուտ ենք լինելու շարունակել Հայաստանյան մեր գործընկերների հետ ընթացող խորհրդակցությունները»,- նշված է հաղորդագրության մեջ:
Ավելի վաղ NEWS.am-ը տեղեկացրել էր, որ Եվրամիությունը կկասեցնի Twinning ծրագիրը: Ի դեպ՝ մեր աղբյուրը նշում է, որ ԵՄ-ն ավարտին կհասցնի միայն սկսված ու ավարտման փուլում գտնվող ծրագրերը, սակայն արդեն իսկ հաստատված, սակայն դեռեւս չսկսված ծրագրերը չեն ֆինանսավորվի:
Նշենք, որ Twinning-ի վերաբերյալ NEWS.am-ն ավելի լայն ու մանրամասն հարցում է ուղարկել ԵՄ հայաստանյան պատվիրակությանը: Մեր հարցաշարը ներառում է հետեւյալ հարցերը.
- Արդյոք Հայաստանի պետական որեւէ գերատեսչություն պաշտոնապես տեղեկացվել է Twinning ծրագրի դադարեցման մասին:
- Հնարավո՞ր է Twinning -ը շարունակվի, սակայն կրճատվեն ծրագրերը:
- Կա՞ թեկուզ Twinning -ի մեկ ծրագիր (թեկուզեւ հաստատման փուլում գտնվող), որը կարող է չիրականանալ՝ Մաքսային միությանը միանալու Հայաստանի նախագահի հայտարարության պատճառով:
- Որքա՞ն է Twinning-ի բյուջեն (ըստ տարիների ու ծրագրերի):