Վրաստանը Եվրամիության հետ Ասոցացման մասին համաձայնագիրը կստորագրի նախքան 2014թ. աշունը: Այս մասին լրագրողների հետ հանդիպման ժամանակ հայտարարել է Վրաստանի ԱԳ փոխնախարար Դավիթ Զալքալիանին՝ մեկնաբանելով Լատվիայում Վրաստանի վարչապետ Բիձինա Իվանիշվիլիի եւ Լեհաստանի արտգործնախարար Ռադոսլավ Սիկորսկիի հանդիպումը:
«Հանդիպումից հետո Լեհաստանի արտգործնախարարը մեզ հայտնեց, որ Վիլնյուսի գագաթաժողովում Ասոցացման մասին համաձայնագրի նախաստորագրումից հետո, ներառյալ` ազատ առեւտուրը, 2014թ. աշնանը փաստաթուղթը կստորագրվի, այսինքն` նախքան ԵՄ-ի ներկայիս հանձնաժողովի լիազորությունների ժամկետի ավարտը», - նշել է Վրաստանի արտգործնախարարի տեղակալը:
Ընդ որում Զալքալիանին զուգահեռ է անցկացրել Ուկրաինայի հետ, որը նախաստորագրումից հետո փաստաթղթի ստորագրմանն է սպասում արդեն երկու տարի: «Այն, որ նախաստորագրումից մի քանի ամիս անց արդեն կստորագրվի, վկայում է, թե ԵՄ-ի համար որքան կարեւոր են «Արեւելյան գործընկերության երկրները», այդ թվում` Վրաստանը», - ասել է նա:
