Հայաստանի փոխվարչապետ, տարածքային կառավարման նախարար Արմեն Գեւորգյանն այսօր՝ հոկտեմբերի 7-ին ընդունել է Իրանի Արեւմտյան Ատրպատականի նահանգի պատվիրակությանը` նահանգապետ Վահիդ Ջալալզադեի գլխավորությամբ: Հանդիպմանը ներկա էր նաեւ ՀՀ Արմավիրի մարզպետ Աշոտ Ղահրամանյանը:
ՏԿՆ հասարակայնության հետ կապերի բաժնից հայտնում են, թե փոխվարչապետը գոհունակություն է հայտնել, որ բարեկամ Իրանի հետ հատկապես վերջին տարիներին միջտարածաշրջանային հարաբերություններն ակտիվորեն զարգանում են` նշելով, որ Հայաստանի կառավարությունը ողջունում եւ խրախուսում է այդ համագործակցությունը: Նա հույս է հայտնել, որ պատվիրակության այցն արդյունավետ կլինի` Հայաստանի գործընկերների, մասնավորապես` Արմավիրի մարզի հետ փոխգործակցության նոր հնարավորությունների բացահայտման տեսանկյունից:
Հյուրերը նույնպես նշել են, որ գործընկեր տարածաշրջանների միջեւ արդեն բավականին հետաքրքիր համագործակցության հիմք է դրվել, բայց առկա է փոխգործակցության բավականին մեծ ներուժ: Նահանգապետի խոսքով` Իրանի նոր կառավարությունը նույնպես ողջունում է Հայաստանի հետ միջտարածաշրջանային մակարդակով հարաբերությունների խորացումը, եւ այս ձեւաչափով գործակցության զարգացումը համարում է առաջնահերթություն:
Նահանգապետը նաեւ փոխվարչապետին եւ Արմավիրի մարզպետին հրավիրել է այցելել Արեւմտյան Ատրպատական:
