Ժամը 11.30-ից վերականգնվել է սպառողների 70%-ի էլեկտրամատակարարումը, NEWS.am-ի թղթակցին հայտնել է էներգետիկայի նախարարի մամուլի քարտուղար Լուսինե Հարությունյանը` մեկնաբանելով Երեւանում էլեկտրականության անջատման պատճառները:
Ըստ նրա` ժ. 10.24-ին Հայաստանի էներգահամակարգը մեկուսացել է Իրանի համակարգից: Ժ. 10.26-ին էներգահամակարգերի զուգահեռ աշխատանքը վերականգնվել է, եւ Իրանից Հայաստան շարունակում է 1290 մՎտ հզորությամբ հոսանք մատակարարվել: Ներկրման պատճառն այն է, որ հայկական ԱԷԿ-ը, որն ապահովում է Հայաստանի էլեկտրաէներգիայի հաշվեկշռի 35-40%-ը, պլանային վերանորոգման եւ վառելիքի լիցքավորման համար կանգնեցվել է:
Խափանման հետեւանքով Հայաստանի էներգահամակարգի հաճախականությունն իջել էր 45 հերցի, ինչն էլ հանգեցրել էր սպառողների հոսանքազրկմանը:
«Ժամը 11.30-ից վերականգնվել է սպառողների 70%-ի էլեկտրամատակարարումը, մնացածներինը վերականգնելու աշխատանքները շարունակվում են», – նշել է Հարությունյանը: Նախարարությունը ուսումնասիրում է կատարվածը` ապագայում նմանատիպ դեպքերը բացառելու համար:
