Նոյեմբերի 20-ին Երեւանում տեղի է ունենում միջազգային կոնֆերանս` «Սոցիալական ցանցերը ժամանակակից հասարակությունների կյանքում. օգտագործումը եւ օգտատերեր» թեմայով, փոխանցում է NEWS.am-ի թղթակիցը:
ԵԱՀԿ-ն եւ Եվրամիությունը աջակցում են սոցցանցերի եւ նոր մեդիաների օգտագործման հարցում` որպես Հայաստանում քաղաքական աշխուժության եւ քաղաքական բանավեճերի խթանման միջոց:
Միջոցառումը կազմակերպել են ԵԱՀԿ երեւանյան գրասենյակը եւ «Ռեգիոն» հետազոտական կենտրոնը` Հայաստանում ընտրական գործընթացը միջազգային չափորոշիչներին համապատասխան կատարելագործելու շրջանակում: Ծրագիրն իրականացվում է ԵԱՀԿ երեւանյան գրասենյակի կողմից` ԵՄ-ի ֆինանսական աջակցությամբ:
Շուրջ 80 մասնակիցներ` լրագրողներ, բլոգերներ, տեղական եւ միջազգային փորձագետներ, Ազգային ժողովի պատգամավորներ եւ քաղաքական գործիչներ կքննարկեն քաղաքացիական աշխուժության եւ քաղաքական գործընթացների թափանցիկության, ավանդական եւ նոր մեդիաների հարաբերակցության, ինչպես նաեւ սոցիալական մեդիաների եւ տեղեկատվական անվտանգության հարցեր:
