Ֆրանսիայի խորհրդարանի Ֆրանսիա-Հայաստան բարեկամության խմբի անդամներ ԵԽԽՎ փոխնախագահ, Ֆրանսիային խորհրդարանի պատգամավոր Ռենե Ռուքեն, Ֆրանսիայի խորհրդարանի պատգամավոր Վալերի Բուայեն, պատգամավորներ Գի դը Սյենը, Ժան Պյեր դը լա Նուանը, ՀՀ-ում Ֆրանսիայի դեսպան Անրի Ռենոն, ինչպես նաեւ ՀՀ ԱԺ Հայաստան-Ֆրանսիա բարեկամական խմբի նախագահ, պատգամավորներ Արա Բաբլոյանը եւ Նաիրա Կարապետյանը այցելել են Գյումրի՝ հարգանքի տուրք մատուցելու 1988թ. աղետալի երկրաշարժի անմեղ զոհերի հիշատակին:
Քաղաքապետ Սամվել Բալասանյանը ողջունել է պատվիրակության անդամներին` բարձր գնահատելով ինչպես Ֆրանսիայի, այնպես էլ հայ-ֆրանսիական բարեկամության խմբի ներդրումը երկու ժողովուրդների միջեւ բարեկամական կապերի ամրապնդման գործում:
Քաղաքապետն առանձնահատուկ նշել է երկրաշարժից հետո Ֆրանսիայի կառավարության եւ ֆրանսիական տարբեր կազմակերպությունների կողմից Գյումրի քաղաքին ցուցաբերված մեծ աջակցության մասին:
Պատվիրակության անդամներն իրենց հերթին ողջույնի ջերմ խոսքեր են հղել քաղաքապետին, հակիրճ ներկայացնելով նաեւ իրենց խմբի գործունեությունը եւ մոտ ապագայում նախանշված ծրագրերը, այնուհետեւ պատվիրակության անդամների կողմից Գյումրու քաղաքապետ Սամվել Բալասանյանը պարգեւատրվել է Ֆրանսիայի խորհրդարանի մեդալով:
Հանդիպումից հետո քաղաքապետը ֆրանսիացի բարեկամների հետ ծաղիկներ են դրել Սուրբ Ամենափրկիչ եկեղեցու բակում տեղակայված 88-ի անմեղ զոհերի հուշարձանին:
