Հայաստանի եւ Ադրբեջանի սահմանին դեկտեմբերի 18-ին կայացել է ԵԱՀԿ հերթական դիտարկումը՝ Կայանավան (Տավուշ) – Բալա Ջաֆարլի (Ադրբեջանի Ղազախի շրջան) գյուղերի ուղղությամբ:
Դիտարկումը սկսվել է ժամը 12:34-ին եւ ավարտվել 12:41-ին:
Մոտ 1000 մետր հեռավորությունից տեսակապ էր հաստատվել: Դիտարկումն առանց միջադեպերի է անցել: Հայաստանի կողմից դիտարկմանը մասնակցել են ԵԱՀԿ գործող նախագահի անձնական ներկայացուցչի դաշտային օգնականներ Իրժի Աբերլեն, Եվգենի Շառովը եւ Պետեր Սվեդբերգը:
Ադրբեջանի կողմում դիտարկում են անցկացրել ԵԱՀԿ գործող նախագահի անձնական ներկայացուցչի դաշտային օգնականներ Խրիստո Խրիստովը եւ Ուիլյամ Փրայորը:
Դիտարկմանը նախորդել էր Տավուշի մարզպետ Արմեն Ղուլարյանի հետ հանդիպումը: Ի թիվս այլոց, քննարկվել էր նաեւ ադրբեջանական կողմից Պառավաքար գյուղի ճանապարհը գնդակոծելու հարցը:
