Վոլգոգրադում Հայաստանի դեսպանն այցելել է կայարանում պայթյունի հետեւանքով վիրավորված հայուհիներին: Այս մասին NEWS.am-ի թղթակցին հայտնել է ՌԴ-ում Հայաստանի դեսպանատան մամուլի քարտուղար Էդուարդ Ջամբազյանը:
«Հյուպատոս Գագիկ Շահամիրյանն այցելել է աղջիկներին եւ հյուպատոսության ու դեսպանատան անունից աջակցության պատրաստակամության հայտնել», - նշել է Էդուարդ Ջամբազյանը, հավելելով, որ հյուպատոսությունը մշտական կապ է պահպանում Վոլգոգրադի տեղական ինքնակառավարման մարմինների հետ:
Ներկայումս վիրավոր աղջիկներից Սուսաննա Գրիգորյանը վերակենդանացման բաժանմունքում է: Նինա Հարությունյանի վիճակը բժիշկները միջին ծանրության են գնահատում:
Վոլգոգրադում երկու ահաբեկչությունների հետեւանքով զոհվել է 30 եւ վիրավորվել 70-ից ավելի մարդ: Կայարանում պայթյունի ժամանակ վիրավորվել են երկու հայուհիներ` ՌԴ քաղաքացի Նինա Մարտունի Հարությունյանը (1981 թ.), եւ ՀՀ քաղաքացի Սուսաննա Սերգեյի Գրիգորյանը (1978թ.): Ըստ նախնական տվյալների` տրոլեյբուսի պայթյունի ժամանակ տուժածների շարքում հայ չկային: