Առկա են բոլոր նախադրյալները, որպեսզի խորհրդարանում կոալիցիայի մաս չկազմող չորս քաղաքական ուժեր կարողանան ձեւավորել միացյալ քաղաքական օրակարգ Հայաստանի առջեւ կանգնած խնդիրների լուծման համար: Այդ մասին NEWS.am-ի թղթակցի հետ զրույցում հաղորդել է «Բարգավաճ Հայաստան» կուսակցության խորհրդարանական խմբակցության քարտուղար Նաիրա Զոհրաբյանը:
Զոհրաբյանի խոսքով՝ խորհրդարանի քաղաքական չորս ուժեր պարբերաբար քաղաքական խորհրատվություններ են անցկացնում, որոնց ժամանակ առ ժամանակ մասնակցում են նաեւ քաղաքացիական հասարակության անդամներ: «Մոտ ժամանակներում ոչ միայն պարտադիր կուտակային թոշակային համակարգի կապակցությամբ, այլ նաեւ այլ խնդիրների շուրջ քաղաքական ուժերը հանդես կգան համատեղ հայտարարությամբ»,- ասել է Զոհրաբյանը՝ նշելով, որ չի ցանկանում բացել փակածերը՝ կապված քաղաքական ուժերի կողմից քննարկվող հարցերի օրակարգի հետ:
Պատգամավորը նաեւ հիշեցրել է, որ «Բարգավաճ Հայաստան» կուսակցությունը բազմիցս է հայտարարել այն մասին, որ մեկ կամ երկու քաղաքական ուժերն ի վիճակի չեն երկիրը դուրս բերել ստեղծված իրավիճակից, անհրաժեշտ է քաղաքական ուժերի եւ քաղաքացիական հասարակության ընդարձակ համախմբում, իսկ դրա համար նախադրյալներ կան:
