«Ներազգային Ազատագրական» շարժման հիմնադիր Վահան Մարտիրոսյանի հայտարարությունը, թե հատուկ սարքով գազն ազոտի միջոցով կալորիազրկվում է, իսկ գազի ծավալն՝ ավելանում, անհիմն եւ անհեթեթ են: Այս մասին NEWS.am-ին հայտնեցին «Գազպրոմ Արմենիա» ՓԲԸ-ի մամուլի ծառայությունից:
«Վահան Մարտիրոսյանի հայտարարությունները որակում ենք անհիմն եւ անհեթեթ, որոնք որևէ մասնագիտական ուսումնասիրություն կամ որեւէ փորձագիտական եզրահանգում չեն պարունակում: «Ասում են թե, լսել ենք, բայց չգիտեմ որտեղ, հնարավոր է» եւ այդ կարգի արտահայտությունների, որոնք ոչ մի լուրջ հարցադրում չեն ներկայացնում, մենք մեկնաբանություն չունենք»,- ասացին մամուլի ծառայությունից:
«Գազպրոմ Արմենիա»-ն պատրաստ է նախաձեռնող խմբերի կողմից առաջարկության դեպքում գազի որակական հատկանիշների մասին փորձարկումներ անել. «Եթե որեւէ մեկը կասկածում է գազի որակական հատկանիշներին, ապա մենք բազմաթիվ անգամ հայտարարել ենք, որ պատրաստ ենք նախաձեռնող խմբերի կողմից առաջարկության դեպքում փորձարկումներ անել, եւ ինչը արել ենք եւ հայտնել հանրությանը»:
Հիշեցնենք, որ այսօր՝ փետրվարի 11-ին, լրագրողների հետ հանդիպման ժամանակ Վահան Մարտիրոսյանը ներկայացրել էր մի սարք, որը գազն ազոտի միջոցով կալորիազրկում է: Նրա խոսքով՝ Ռուսաստանից նորմալ որակի գազ է ներկրվում Հայաստան, սակայն հետո այն կալորիազրկվում է, ավելանում է եւ տրամադրվում բնակչությանը:
