Ուկրաինայի նախկին վարչապետ, օրեր առաջ բանտից ազատ արձակված Յուլյա Տիմոշենկոն ընդունել է Գերմանիայի կանցլեր Անգելա Մերկելի առաջարկությունը՝ բուժում անցնել «Շարիտե» հիվանդանոցում: Այս մասին հայտնի է դարձել երկու քաղաքական գործիչների հեռախոսազրույցի արդյունքում, որը կայացել է փետրվարի 23-ին, հաղորդում է Տիմոշենկոյի մամուլի ծառայությունը:
Համաձայն հաղորդագրության, Տիմոշենկոն նախատեսում է այցելել Եվրոպական ժողովրդական կուսակցության գագաթաժողովին, այնուհետեւ մեկնել «Շարիտե»՝ բուժման:
Հիշեցնենք, որ փետրվարի 22-ին Տիմոշենկոն ազատ է արձակվել Գերագույն Ռադայի որոշմամբ: Նրան Խարկովի հիվանդանոցից դուրս են բերել անվասայլակով: Նա անմիջապես մեկնել է Կիեւ, հարգել Մայդանի զոհերի հիշատակը եւ ելույթ ունեցել Մայդանում:
Ավելի ուշ, փետրվարի 23-ին Տիմոշենկոն մեկնել է Դնեպրոպետրովսկ՝ մոր մոտ:
