Երեւանում տեղի է ունեցել հայ-սերբական առաջին գործարար համաժողովը: Համաժողովի կազմակերպիչներն են Սերբիայի Առեւտրաարդյունաբերական պալատը եւ Զարգացման հայկական գործակալությունը: Բացմանը ներկա են եղել Սերբիայի արտգործնախարար Իվան Մրկիչը եւ ՀՀ էկոնոմիկայի նախարար Վահրամ Ավանեսյանը: Կողմերը նշել են առեւտրի զարգացման ոլորտում փոխադարձ հետաքրքրվածությունը եւ ընդգծել, որ երկկողմ կապերի զարգացումը կօգնի լավ բացահայտել առկա ներուժը:
Նշենք, որ 2013թ. Հայաստանից Սերբիա արտահանումը լուրջ աճել է: Եթե 2012թ. այն կազմում էր 78 հազար դոլար, ապա 2013թ.՝ 5,6 միլիոն դոլար: 2012թ. Սերբիայից ներկրումը կազմել է 1,8 միլիոն դոլար, 2013թ.՝ 2,5 միլիոն դոլար: Սերբիայից հիմնականում ներկրվում է արդյունաբերական արտադրանք՝ դեղորայք, սարքավորումներ, գյուղատնտեսական մեքենաներ: