Եվրոպական միության ամենամյա մրցանակաբաշխության ժամանակ «Ուսումնասիրություն» անվանակարգում մրցանակ է շնորհվել Մոսկվայի Արվեստաբանության պետական ինստիտուտի աշխատակից, ճարտարապետության դոկտոր, «ԻԿՕՄՕՍ/Հայաստան» կազմակերպության անդամ Արմեն Ղազարյանին:
Կազմակերպության տարածած հայտարարությունում մասնավորապես ասվում է. «Եվրոպական միությունը եւ «Եվրոպա նոստրա» կազմակերպությունը Հաագայում ներկայացրել են մշակութային ժառանգության բնագավառում Եվրոպական միության ամենամյա մրցանակաբաշխության հաղթողներին: Երեսուն երկրներից ներկայացված 160 նախագծերից մրցանակի են արժանացել 27-ը:
Մրցույթի շրջանակում «Եվրոպա նոստրա» ամենամյա մրցանակի են արժանացել ԵՄ կողմից 2007-2013թթ. իրականացված ՄՇԱԿՈՒՅԹ ծրագրին ոչ-մասնակից եվրոպական 2 երկրներից /Ռուսաստան, Շվեյցարիա/ ներկայացված նախագծեր եւս: Վերջիններիս թվում, «Ուսումնասիրություն» անվանակարգում մրցանակ է շնորհվել նաեւ Մոսկվայի Արվեստաբանության պետական ինստիտուտի աշխատակից, ճարտարապետության դոկտոր, «ԻԿՕՄՕՍ/Հայաստան» կազմակերպության անդամ Արմեն Ղազարյանին` «Հարավային Կովկասի 7-րդ դարի եկեղեցական ճարտարապետությունը» քառհատոր ուսումնասիրության համար: «Եվրոպա նոստրա»-ի կողմից տարածված հաղորդագրության մեջ մասնավորապես նշվում է. «Ժյուրին տպավորված է այս գիտական ուսումնասիրության եւ վերլուծության արդիական նշանակությամբ: Այն ընդգրկում է 7-րդ դարում Հարավային Կովկասում քրիստոնեական ճարտարապետության համալիր զարգացումը, սահմանում է ժամանակագրությունը, բացահայտում ճարտարապետության մեջ միջնադարյան պատկերագրության սկզբունքները տարածաշրջանում եւ այլուր Եվրոպայում: Այս ուսումնասիրության մեջ օրինակելի են մեթոդաբանության ճշգրտությունը եւ եզրահանգումների խորությունը»: