Վարչապետի նշանակումը քաղաքական մեծամասնության մենաշնորհն է, կապրենք, կտեսնենք, թե ինչքանով Հովիկ Աբրահամյանը կարդարացնի իրեն: Նոր վարչապետի նշանակման մասին տեղեկությանն արձագանքեց ԱԺ ՀՅԴ խմբակցության քարտուղար Աղվան Վարդանյանը:
Հարցին` արդյոք Հովիկ Աբրահամյանը կարող է տնտեսությունը հանել ճգնաժամից եւ ինչքանով է ճիշտ նրա նշանակումը, Աղվան Վարդանյանը պատասխանեց. «Վարչապետի նշանակումը քաղաքական մեծամասնության մենաշնորհն է, կապրենք, կտեսնենք»:
Էդուարդ Շարմազանովի հայտարարությանը, թե իրենք պատրաստ են ՀՅԴ-ին նախարարի պաշտոն առաջարկել կառավարության կազմում, ՀՅԴ խմբակցության քարտուղարն արձագանքեց. «Բազմիցս ասել ենք, որ մենք քննարկում ենք ծրագրային հարցեր, կառավարության կազմ մտնելը կախված է նրանից` արդյոք իշխանությունները կհամաձայնվեն մեր ծրագրերի հետ, թե ոչ»:
Նշենք, որ այսօր ՀՀԿ գրասենյակում կայացել է Գործադիր մարմնի, ապա ՀՀԿ խորհրդի նիստ, որտեղ էլ հրապարակվել է նոր վարչապետի՝ Հովիկ Աբրահամյանի անունը: Վերջինս 20 օր ժամանակ ունի նոր կառավարության կազմը ներկայացնելու համար:
