Ուկրաինայի ԵՄ մտնելը առայժմ բավական բարդ խնդիր է թվում, NEWS.am-ին հայտնել է Չեխիայի Դիվանագիտական ակադեմիայի ռեկտոր Կիրիլ Սվոբոդան` մեկնաբանելով Չեխիայի նախագահ Միլոշ Զեմանի` մարտի սկզբին արած հայտարարությունը: Այն ժամանակ Զեմանը հայտարարել էր, որ եթե Ուկրաինան ցանկանում է եվրաինտեգրման ճանապարհով գնալ, ապա առաջիկա 5-10 տարվա ընթացքում պետք է պատրաստ լինի նույն զոհերին, ինչ որ ԵՄ երկրները. առաջին հերթին խոսքը ածխաջրածինների թանկացման մասին է:
«Կարծում եմ` մեր նախագահն իրավացի է: ԵՄ-ին անդամակցելը հեշտ չէ: Պետք է ձեւափոխել տնտեսությունը, քաղաքական եւ իրավական համակարգը: Այս ամենը ժամանակի հարց է»,- հայտարարել է Սվոբոդան:
Ըստ նրա` Ուկրաինայի շուրջ բարենպաստ իրավիճակ ստեղծելու համար անհրաժեշտ է բարելավել նաեւ հարաբերությունները տարածաշրջանում ազդեցիկ ուժերի հետ, առաջին հերթին` Ռուսաստանի եւ ԵՄ-ի:
«Այստեղ զրույցներ են պետք, որոնք երկար պետք է լինեն, սակայն դրանց համար ժամանակ կլինի նախագահական ընտրություններից հետո: Այժմ պետք է սպասել դրանց», - հավելել է փորձագետը:
Ի պատասխան հարցի` իրական են արդյոք Արեւելյան Եվրոպայի նախկին սոցիալիստական երկրներից Ուկրաինա գազի մատակարարումները, Սվոբոդան նշել է, որ դա ոչ միայն տնտեսական, այլեւ քաղաքական խնդիր է: «ԵՄ-ն եւ Ռուսաստանը պետք է ավելի լավ հարաբերություններ ունենան, քան այժմ: Իսկ եթե ոչ, ապա դուք տեսնում եք, թե ինչ կատարվեց եւ ինչ է կատարվում Եգիպտոսում կամ Սիրիայում: Ուկրաինան պետք է իր սեփական ընտրությունը կատարի, սակայն դրա համար համագործակցության մթնոլորտ է հարկավոր, այդ թվում նաեւ` ԵՄ-ի եւ Ռուսաստանի հետ», - հավելել է նա:
Հիշեցնենք, որ Ուկրաինայի նախագահական ընտրությունները նշանակված են մայիսի 25-ին: