«Դեմ եմ» քաղաքացիական նախաձեռնությունը համատեղ աշխատելու է խորհրդարանական չորս ուժերի` ԲՀԿ-ի, ՀՅԴ-ի, ՀԱԿ-ի եւ «Ժառանգության» հետ կուտակային կենսաթոշակային նոր օրենքի մեջ փոփոխություններ կատարելու համար: Այս մասին այսօր` ապրիլի 19-ին, լրագրողների հետ հանդիպման ժամանակ հայտնեցին նախաձեռնության անդամները:
«Մենք ոչ թե համագործակցելու ենք, այլ համատեղ աշխատելու ենք նոր օրենքում փոփոխություններ կատարելու վրա»,- ասաց Արսեն Մանուկյանը:
Անդրադառնալով ապրիլի 18-ին կայացած հավաքին, որին չորս ուժերը չէին մասնակցում, նախաձեռնության անդամները ասացին, որ նրանց գալը անտրամաբանական կլիներ:
«Ապրիլի 12-ին կոչերի եւ ելույթների օր էր, եկավ մեր շահերը ՍԴ-ում պաշտպանող ՀՅԴ խմբակցության պատգամավոր Արծվիկ Մինասյանը, ներկայացրեց իր տեսակետը, սա տրամաբանական է, սակայն երեկ ելույթների օր չէր եւ գալն անտրամաբանական կլիներ»,- ավելացրեց նախաձեռնության անդամ Դավիթ Մանուկյանը:
Չորս ուժերը մինչեւ այս հայտարարել էին, որ կուտակայինի վերաբերյալ արտահերթ նիստ են հրավիրելու, սակայն NEWS.am-ի հետ զրույցում Գեւորգ Գորգիսյանն ասաց, որ այլեւս արտահերթ նիստ հրավիրելու կարիք չկա:
«Մնաց մեկ շաբաթ, չեմ կարծում, որ արտահերթ նիստ կլինի, քանի որ ապրիլի 28-ին Հովիկ Աբրահամյանը կուտակայինի նախագիծը ներկայացնելու է Ազգային ժողով»,- նշեց Գեւորգը:
ԱԺ ՀՀԿ խմբակցության ղեկավար Գալուստ Սահակյանն էլ մեզ հետ զրույցում հայտնեց, որ քառյակը արտահերթ նիստ հրավիրելու համար դեռ ձեւաթուղթ չի վերցրել: