Հայտնի ռեժիսոր Ատոմ Էգոյանը բաց նամակ է հղել Թուրքիայի ժողովրդին, որը Ցեղասպանության 99-րդ տարելիցի նախօրեին հրապարակվել է Ստամբուլի հայկական «Ակօս» թերթի կայքում։
«Ես հոգնել եմ իմ զայրույթից», - այսպես է սկսվում նամակը: «Ես միշտ մտածում էի, որ եթե դուք հասկանայիք այն, ինչ ես գիտեմ, ձեզ ինձ պես կզգայիք: Կմտածեիք, որ արդեն բավական է, եւ ժամանակն է առաջ շարժվելու», - գրում է Էգոյանը:
Ըստ նրա՝ ինքը տեսնում է՝ ինչպես են թուրք հասարակության ներկայացուցիչները խիզախաբար կանգնում եւ ասում ճշմարտությունը:
«Մենք հիշելու խոստում ենք տվել, եւ ոճիրը դեռեւս թարմ վերք է այն հողում, որտեղ իրագործվել է: Ես հոգնել եմ ձեր կառավարության կատաղի ժխտումից, հոգնել եմ առաջ շարժվելու անկարողությունից»,- գրել է նա:
Էգոյանը նշել է, որ Թուրքիայի կառավարությունը 100 տարի է նրանց պարտադրում է ոճրագործության ժխտումը:
«Երբեք չեն լինի հանձնաժողովներ «իրականությունը բացահայտելու» համար, եւ մեզ հետաքրքիր չեն ձեր բաց արխիվները: Մենք իրականությունը գիտենք մեծ թվով ականատեսների շնորհիվ, մենք տեսել ենք պատերազմի ձեր մեղսակիցների արխիվները, լսել ենք աշխարհի բոլոր ցեղասպանագետների եւ Հոլոքոստի գիտնականների իմաստուն կարծիքը: Այսօր ձեզնից միայն խնդրում եմ, որ անեք այն, ինչ ձեզնից հասնում է. հարց ուղղեք ձեր կառավարությանը շարժառիթների մասին եւ ընդվզեք այս անսովոր մարտահրավերին ընդառաջ»:
Հիշեցնենք, ավելի վաղ Թուրքիայի ժողովրդին նամակով դիմել էր աշխարհահռչակ ռոք երաժիշտ Սերժ Թանկյանը: