2005-ի ապրիլից թուրքական հասարակության մեջ շատ բան փոխվեց. Հայոց ցեղասպանության մասին գիտաժողով անցկացվեց, թուրքերը սկսեցին խոսել Ցեղասպանության մասին, ապրիլի 23-ին «Իրադրությունը Թուրքիայում եւ Հայաստանում 99 տարի անց» թեմայով քննարկմանը հայտարարել է ստամբուլահայ լրագրող, թուրքական «IMC» հեռուստաալիքի լրատվական ծրագրերի ղեկավար Արիս Նալչինը:
Ըստ նրա՝ 2007թ., երբ սպանվեց «Ակօս» թերթի գլխավոր խմբագիր Հրանտ Դինքը, թուրքական մտավորականության որոշ ներկայացուցիչներ բողոքի ձայն բարձրաաացրեցին: «Ապրիլի 24-ին Հայոց ցեղասպանության հարցով հավաքներ եղան, դա մեծ քայլ էր», - Նալչինը: Նա ընդգծել է, որ բողոքող թուրք հասարակության շարքերում հիմնականում կարելի է տեսնել նոր եւ կրթված սերնդին:
Ապրիլի 23-ից, այսինքն՝ այսօրվանից, հայտնել է Արիս Նալչինը, Ստամբուլի Թաքսիմ հրապարակում սկսվել են Հայոց ցեղասպանության հետ կապված ցույցերը, իսկ ապրիլի 24-ին հավաքներ տեղի կունենան Թուրքիայի համալսարաններում: Ըստ նրա՝ Դիարբեքիրում, Այնթափում, Անթալիայում հավաքներ կլինեն, իսկ Վանում ցույց է տեղի ունենալու: «Սակայն, չնայած դրան, Թուրքիայի կառավարության ժխտողական դիրքորոշումը չի փոխվել», - նշել է նա: