Այսօրվա նիստի ընթացքում «Կուտակային կենսաթոշակների մասին» օրենքում փոփոխություններ մտցնելու մասին կառավարության ներկայացրած օրինագիծն էր քննարկվում, եւ նշվել է, որ մտահոգություններն այլեւս անցյալում չեն, քանի որ մեր առաջարկությունները հաշվի չեն առնվել: Այս մասին ապրիլի 30-ին, չորս խորհրդարանական խմբակցությունների ներկայացուցիչների նիստից հետո լրագրողների հետ ամփոփիչ զրույցին հայտնել է «Ժառանգություն» կուսակցության խորհրդարանական խմբակցության ղեկավար Ռուբեն Հակոբյանը:
Նրա խոսքով, չորս խորհրդարանական խմբակցությունները օրինագծի շուրջ համատեղ առաջարկություններով հանդես կգան: «Քննարկումների ընթացքում կտեսնենք` ինչ դիրքորոշում կունենա քաղաքական մեծամասնությունը: Եթե առաջարկությունները չընդունվեն, ապա չորս խորհրդարանական խմբակցությունները կրկին կհավաքվեն եւ տրամաբանական պատասխան կտան»- ասել է նա:
Ի պատասխան հարցի, թե արդյոք ստացվում է` վարչապետ Հովիկ Աբրահամյանը չի արդարացրել խորհրդարանական քառյակի հույսերը, Հակոբյանը նշել է. «Ցավոք սրտի, կուտակային կենսաթոշակների մասին նոր օրինագծում նրա դրական հավաստիացումներն առկա չեն»:
Խմբակցության ղեկավարը նաեւ նշել է, որ չորս ուժերի համար օրակարգային է մնում խորհրդարանի արտահերթ նիստ անցկացնելու հարցը: