Նուբարաշենի բնակիչ, 22-ամյա Վանուշ Ալեքսանյանին դանակահարելու մեջ մեղադրվող Սեդրակ Օսիպյանը ոստիկանություն կներկայանա այն ժամանակ, երբ «կարվեն հատուկ գործողություններ»: Այս մասին NEWS.am-ի հետ զրույցում ասաց Երեւանի փոխոստիկանապետ Վալերի Օսիպյանի եղբորորդու փաստաբան Կրոմվել Գրիգորյանը:
«Դեռ չի ներկայացել ոստիկանություն, կներկայանա այն ժամանակ, երբ կարվեն գործողություններ»,- ասաց նա:
Թե ինչ գործողությունների մասին է խոսքը, փաստաբանը հրաժարվեց պատասխանել:
Նշենք, որ 22-ամյա Սեդրակին կալանավորելու որոշում դատարանը կայացրել էր դեռ հունիսի 3-ին: Վերջինս գտնվում է հետախուզման մեջ:
Ավելի վաղ NEWS.am-ը հայտնել էր, որ դեպքը տեղի է ունեցել հունիսի 1-ի գիշերը Նուբարաշենում: Վիճաբանությունից եւ ծեծկռտուքից հետո 22-ամյա Վանուշ Ալեքսանյանին տեղափոխել էին «Էրեբունի» բժշկական կենտրոն, որտեղ վերջինս վիրահատվել էր: Ըստ ոստիկանության՝ դանակահարողը Երեւանի փոխոստիկանապետ Վալերի Օսիպյանի եղբորորդին է՝ 22-ամյա Սեդրակ Օսիպյանը: Վերջինս սակայն մեզ հետ զրույցում նշել էր, որ իր ազգականը ոչ մի կապ չունի դանակահարության հետ: