ԵՄ գերագույն ներկայացուցիչ Քեթրին Էշթոնը ԵՄ 28 պետությունների անունից զորակցություն է հայտնել Ուկրաինայի նախագահ Պյոտր Պորոշենկոյի գործողություններին: Այդ մասին նա հայտարարել է Ուկրաինայի նախագահի հետ հեռախոսազրույցի ժամանակ, փոխանցում է ԼԻԳԱ-ն՝ վկայակոչելով Պորոշենկոյի մամուլի ծառայությունը:
Պորոշենկոն էլ նշել է, որ հրադադարի ռեժիմը դադարեցնելուց հետո Ուկրաինան ավելի քիչ կորուստներ է կրում, քան հրադադարի ժամանակ, քանի որ ռուսամետ ակտիվիստները չէին դադարեցրել կրակելը: Նախագահը պարզաբանել է, որ այդպիսի իրավիճակում ԱԱՊԽ-ի որոշման հիման վրա ինքը ստիպված է եղել վերսկսել հակաահաբեկչական գործողությունը:
Պորոշենկոն վստահեցրել է, որ 4 երկրների արտգործնախարարների բեռլինյան պայմանավորվածությունները շարունակելով՝ Ուկրաինան պատրաստ է եռակողմ խմբի հետագա աշխատանքին, մասնավորապես՝ հաջորդ նիստը հուլիսի 5-ին անցկացնելուն: Ուկրաինան նիստն անցկացնելու տեղ եւ ժամ է առաջարկել եւ սպասում է մյուս կողմի հաստատմանը:
Քեթրին Էշթոնը հետաքրքրվել է ԵՄ-ից Ուկրաինայի սպասելիքների մասին: «28 պետության անունից ցանկանում եմ վստահեցնել, որ Դուք ունեք մեր զորակցությունը», - ընդգծել է նա:
